Tirkiye dest bi amadekariyên operasyonek nû li Rojavayê Kurdistanê dike

PeyamaKurd – Artêşa Tirkiyê, fermana ‘Ji operasyonê re amade bin’ da çekdarên Artêşa Niştimanî ya opozîsyona Sûriyê û dest bi amadekariyên operasyonek nû li Rojavayê Kurdistanê li dijî YPG û HSDê dike.

Piştî gefên Serokomarê Tirkiyê Recep Tayip Erdogan û Wezîrê Berevaniyê ya Tirkiyê yên destpêkirina operasyonekê li Rojavayê Kurdistanê, artêşa Tirkiyê dest bi amadekariyên operasyonek nû li Rojavayê Kurdistanê li dijî YPG û HSDê dike. Armanca vê carê ya operasyona Tirkiyeyê, bajarê Til Rifat û Eyn Îsa ye.

Li gor zanyariyên ji çapemeniya Tirkiyê, Artêşa Tirkiyê fermana ji operasyonek nû re amade bin daye çekdarên Artêşa Niştimanî ya Sûriyê. Herwiha Tirkiye û komên çekdar, hêzê ser sînorê Til Rifat û Eyn Îsa kom dikin.

Ev amadekarî di demekê de ne, berî du rojan jî Tirkiyê ji dronan ve belavok li asîmanê Til Rifatê belav kirin û daxwaza alîkariyê ji rûniştvanên wê navçeyê kirin.

Artêşa Niştimanî ya Sûriyê ji komên çekdar ên opozîsyona Sûriyê pêk tê û berê di bin fermana artêşa Tirkiyê de, di Çileya sala 2018an de êrîş ser Efrînê û di Cotmeha 2019an de êrîş ser Girê Sipî û Serê Kaniyê kirin û dagîr kirin.