Wezareta Tendirustiyê ya Iraqê: Di sewatê de 60 kesan can dane

PeyamaKurd - Wezareta Tendirustiyê ya Iraqê, amarên dawî yên qurbaniyên şewata nexweşxaneya El-Husên li Nasiriye belav kir û da zanîn, di bûyerê de 60 kesan can dane.

Wezareta Tendirustiyê bi daxuyaniyekê diyar kir, amarên qurbaniyan ên di demên dawî de li dezgehên ragihandinê û li torên civakî hatine weşandin, ne rast in.

Di daxuyaniyê de hat destnîşankirin, piştî bidawîbûna karên tîmên Berevaniya Şaristanî û Bijîşka Dadî li nexweşxaneya Îmam El-Husên, hejmara qurbaniyên ku nasnameya wan hatine naskirin 39 kes in û nasnameya 21 termên din jî nehatine naskirin.

Herwiha eşkere kir, ew niha kar ji bo naskirina nasnameyên wan 21 terman dikin û her dema rêkarên Bijîşkiya Dadê biqedin û nasname bên naskirin, dê rabigihînin.

Pêr bi şevê agir bi nexweşxaneya El-Husên a Koronayê li bajarê Nasiriye yê li parêzgeha Zîqarê li başûrê Iraqê ket û di encamê de 60 kesî can dan û bi dehan kes birîndar bûn.

Heta niha sedemên şewata nexweşxaneyê nehatine zanîn, lê desthiladarên Iraqê diyar kirin ku wan komîteyeke lêkolînê pêk anîne. Serokwezîrê Iraqê Mistefa Kazimî jî biryara jikardûrxistin û lêpirsîna bi Rêveberê Tendirustiyê û Rêveberê Berevaniya Şaristanî re da.

Her di derbarê vê bûyerê de jî, Dadgeha Nasiriye desteserkirina 13 berpirsên xwecihî da.