Wezareta Pêşmerge: Êdî berpirsiyariya Iraqê ye

RûpelNews - Wezareta Pêşmerge derbarê vekişîna hêzên Amerîka û koalîsyonê ji Iraq û Herêma Kurdistanê daxuyaniyeke nivîskî weşand.

Wezaretê destnîşan kir ku vekişîna hêzên Amerîka û koalîsyonê ji axa Iraq û Herêma Kurdistanê ji bo 30ê Îlonê hatiye plankirin û diyar kir ku ev biryar encama lihevkirineke dualî ye ku di navbera hikûmetên Iraq û Amerîkayê de hatiye kirin.

Daxuyaniyê destnîşan kir ku vekişîn di demek hestiyar de pêk tê ku rewşa ewlehiyê li Iraq û Rojhilata Navîn ne aram bû.

"Bêparmayîna ji sîstemeke parastinê cihê fikaran e"

Wezareta Pêşmerge diyar kir ku, di mehên dawî de di dema pevçûna di navbera DYA û Îranê de, Herêma Kurdistanê rastî zêdetirî hezar êrîşên dron û mûşekên balîstîk hatiye.

Li gorî Wezaretê, di êrîşan de hejmareke zêde ya welatiyan şehîd û birîndar bûne û zirareke mezin a madî çêbûye.

Daxuyaniyê destnîşan kir ku, di şert û mercên heyî de, hiştina Herêma Kurdistanê bêyî ti sîstemeke parastinê "sedemeke nîgeraniyê" ye.

Wezaretê tekez kir ku asîmanê Herêma Kurdistanê beşek ji asîmanê Iraqê ye û diyar kir ku parastina wê, ji niha û pê de, berî her tiştî berpirsiyariya hikûmeta federal a Iraqê ye.

"Pêşmerge ji bo her geşedaneke nû amade ne"

Wezareta Pêşmerge spasiya DYA û hêzên hevpeymaniyê kir ji bo piştgirî û alîkariya ku wan di salên dawî de daye Pêşmergeyî.

Wezaretê, ji bo ku xelkê Herêma Kurdistanê dilniya bike, diyar kir ku hêzên Pêşmerge ji bo her geşedaneke nû ya ku dibe ku rû bide amade ne, dikarin xwe li gorî şert û mercên guherbar biguncînin, û di rewşeke wisa de ne ku li dijî gefan bisekinin.

Di daxuyaniyê de herwiha hat destnîşankirin ku Wezareta Pêşmerge beşek ji sîstema parastinê ya Iraqê ye û bi artêşa Iraqê re têkiliyên ewlehî û destûrî yên xurt diparêze û hat zêdekirin ku hevkarî û hevrêziya hevbeş dê berdewam bike.