Trump û Şi: Em bi hev re karê xwe bidomînin

RûpelNews - Serokê Amerîkayê Trump û Serokê Çînê Şi li Qesra Spî di weşana zindî de derketin pêşberî kamerayan.

Trump bi destnîşankirina kêfxweşiya xwe ya mezin a ji bo pêşwazîkirina Şi, got: "Ji bo Melania û min şerefeke mezin e ku em pêşwaziya Serok Xi li Washingtonê dikin; ew yekem rêberê Çînî ye ku serdaneke duyem a fermî ji Amerîkayê re pêk tîne."

Trump bi bîr xist ku her du welat ji dema ku ew di sala 2016an de bû serok, têkiliyeke li ser bingeha berjewendiyên hevbeş ava kirine û got: "Em bi vê têkiliya di navbera xwe de pir serbilind in."

Serokê Amerîkayê baweriya xwe anî ziman ku her du welat dikarin bi hev re gelek tiştan bi dest bixin û amaje bi têgeha "bi hev re kar kirin" kir têgehek ku Hêzên Deryayî yên Amerîkayê (Marine Corps) ji artêşa Çînê wergirtine.

Trump bi tekezî li ser potansiyela "bi hev re kar kirina" bi Çînê re rawestiya û got: "Ez û Serok Şi dê ji bo avakirina pêşerojeke baştir ji bo welatên xwe, bi hev re karê xwe bidomînin."

Trump diyar kir ku rêveberiya Amerîkayê ji bo avakirina têkiliyên bazirganî yên hevsengtir di nav de gihîştina bazarên nû ji bo cotkar û hilberînerên heywanan ên Amerîkî kar dike û da zanîn ku ew ê van mijaran bi Xi re gotûbêj bike.

Trump her wiha destnîşan kir ku ew ê di hevdîtinên xwe de mijarên têkildarî ewlehî, teknolojî û "super-aqil"  jî binirxînin û got: "Biryarên ku em îro di van waran de digirin, dikarin bi dehan salan aştiyê û xweşguzeraniyê pêş bixin."

Piştî hevdîtinên di navbera her du rêberan de, Trump dê êvarê li ser şerefa Şi şîveke fermî bide. Tê payîn ku her du rêber roja Înê dîsa li Qesra Spî bicivin.

Li gorî rayedarekî payebilind ê Amerîkayê, tê payîn ku karsazên navdar ên Amerîkî – wekî Jeff Bezos, Elon Musk, Sundar Pichai, Michael Dell, Jensen Huang, Sam Altman, Jane Fraser û Tim Cook – beşdarî wê şîva ku îvarê li ser şerefa Xi tê lidarxistin, bibin.

Serdana Xi, yekem serdana wî ya bo Washingtonê ye ji sala 2015an vir ve.