Reza Pehlevî: Yekîtiya axa Îranê nabe mijara nîqaşê
Piştî ku pênc partiyên siyasî yên kurd li Rojhilatê Kurdistanê li dijî rejîma Îranê îttifaqek hevbeş ragihand, Reza Pehlevî bal kişand ser “xeta sor” ya yekitiya axa Îranê. Wî diyar kir ku yekitiya Îranê ne mijara danûstandinê ye û li ser vê mijarê tu tawîz nayê dayîn.
RûpelNews - Reza Pehlevî di daxuyaniya xwe de diyar kir ku yekitiya neteweyî ya Îranê ne mijara nîqaşê ye. Wî got ku parastin û parêzandina yekitiya axa welat prensîbêk bingehîn e û li ser vê mijarê tu danûstandin nayê kirin û tu tawîz jî nayê dayîn.
Pênc partiyên siyasî yên Rojhilatê Kurdistanê di 22ê Sibatê ragihandin ku ji bo têkoşîna li dijî rejîma Îranê hevbendiyeke nû ava kirine. Ev hevbendî bi navê “Hevbendiya Hêzên Siyasî yên Kurdistana Îranê” hate ragihandin.
Di nav vê hevbendiyê de ev partî cih digirin:
Partiya Demokrat a Kurdistanê – Îran (PDK-Î), Rêxistina Xebata Kurdistanê – Îran (Xebat), Partiya Azadiya Kurdistanê (PAK), Komeleya Zehmetkêşan a Kurdistanê (Komele) û Partiya Jiyana Azad a Kurdistanê (PJAK).
Di daxuyaniya hevbeş de hate diyarkirin ku armanca îttifaqê bersivdayîna şert û mercên siyasî yên heyî û zêdekirina hevrêziya di nav tevgera siyasî ya kurdî de ye. Herwiha hat gotin ku armanca bingehîn hilweşandina Komara Îslamî ya Îranê ye.
Di daxuyaniyê de mafê kurdan yê diyarkirina qederê xwe û avakirina avahiyeke “neteweyî û demokratîk” li Rojhilatê Kurdistanê jî hat xuyangkirin. Wekî din, piştgirî ji çalakî û protestoyên civakî yên li dijî rejîmê li Îranê hate ragihandin.
Peyama “xeta sor” ji Pehlevî
Piştî daxuyaniya îttifaqê, Reza Pehlevî li ser hesabê xwe yê Xê daxuyanî da û îdia kir ku “hin komên cudaxwaz li ser yekitiya axa Îranê îdîayên bêbingeh belav dikin”.
Wî dubare kir ku yekitiya neteweyî nabe mijara nîqaşê, û parastina axa welêt prensîbek bingehîn e ku tu tawîz li ser nayê dayîn. Li gorî Pehlevî, nîqaşên li ser yekitiyê şert û mercê didin ku rejîm xwe wek “parêzvanê yekitiyê” nîşan bide, lê wî îdia kir ku ji roja ku hat ser desthilatdariyê, berpirsyariya cudakirin û parçeparçebûna civakê li ser milê rejîmê ye.
Bang li artêşa Îranê
Reza Pehlevî di daxuyaniya xwe de jî bang li artêşa Îranê kir û got ku artêş divê “erka xwe ya neteweyî û welatparêzî pêk bîne û li kêleka gel raweste”.
Wî diyar kir ku di demên pêş de dê ji bo dawîkirina rejîmê û herwiha parastina yekitiya axa welêt helwesteke xurt were girtin.
Balkişandina li ser “Îraneke demokratîk”
Pehlevi herwiha bal kişand ser “Îranekê demokratîk”. Li gorî wî, di çarçoveya dewletekê mafî ya ku yekitiya axa welat diparêze de, hemû hemwelatî bêyî cudakirin li ser bawerî, ol, ziman an jî nasnameya etnîk dikarin mafên wekhev bistînin.
Îlana peymana partiyên kurdî û peyama xurt a Pehlevî ya li ser “yekitiya axa welêt” nîqaşên di nav muxalefeta Îranê de li ser yekitiya neteweyî û mafê diyarkirina qederê xwe careke din anî rojevê.
Rıza Pehlevi, ku wek kurê Şahê dawî yê Îranê Muhammed Reza Pehlevî tê naskirin, piştî Şoreşa Îslamî ya 1979’an ji Îrane derket. Ew di salên dirêj de bi bangewaziyên ji bo demokrasî, azadî û guhertina rejîmê tê rojevê.
