‘Milîsek iraqî yê girêdayî Îranê êrîşên li Ewropayê dane kirin’
Desthilatdarên Amerîkayê serkirdeyê milîsê iraqî Mihemed Beqer Saad Dawûd el-Saadî, ku tê diyarkirin li pişt êrîşên şewitandinê yên li ser hedefên cihû û yên girêdayî Îsraîlê li Ewropayê ye, desteser kirin.
RûpelNews - Li gorî raporeke kovara almanî Der Spiegel, Mihemed Beqer Saad Dawûd el-Saadî bi organîzekirina herî kêm 18 êrîşên ku di mehên dawî de li gelek bajarên Ewropayê hatine kirin, tê tawanbar kirin.
Di êrîşan de kinîşt, dibistanên cihûyan, bankayên amerîkî û xwaringeheke îsraîlî li Munîhê hebûn. Komeke milis a berê nenas a bi navê "Harakat Ashab al-Jamin al-Islamija (HAJI)" li ser medyaya civakî berpirsiyariya êrîşan li xwe girt. Lêbelê, îstixbarata navxweyî ya Almanyayê nirxand ku êrîş bi torên şîe yên Îranparêz ên iraqî ve girêdayî ne.
Pêwendiyên wî bi Suleymanî û Nasrallah re
Li gorî îdiaynameya Amerîkayê, Saadî yê 32-salî yek ji kesayetiyên sereke yên rêxistina Ketaîb Hizbulah a ku navenda wê li Iraqê ye, ye. Ev kom beşek ji "Teqeka Berxwedanê" ya alîgirê Îranê ye. Raporê bal kişand ser wêneyên Saadî yên bi Qasim Suleymanî, fermandarê berê yê Hêza Qudsê ya Supaya Pasdaran a Îranê ku ji aliyê DYAyê ve hatibû kuştin, û beşdariya wî ya di merasîma cenazeyê serokê kuştî yê Hizbulahê Hesen Nasrallah de.
Li gorî raporê, Saadî di salên dawî de gelek caran çûye Parîs, Madrid, Mîlano, Viyana, Moskow û Dubeyê. Hat destnîşankirin ku rayedarên Îtalyayê di sala 2024an de vîzeya wî ji ber gumana "çalakiyên tundrew" betal kirine.
Êrîş li çend welatan
Li gorî dosyeya lêpirsînê, pêla êrîşan piştî êrîşên hewayî yên DYA û Îsraîlê yên li dijî Îranê dest pê kir. Dozgeriyê destnîşan kir ku Saadî li ser medyaya civakî bang kiribû ku "her kesê ku piştgiriya Amerîka û Îsraîlê dike were kuştin". Demeke kin şûnde, êrîşên şewitandinê li Belçîka, Holenda, Fransa, Brîtaniya, Almanya û Makedonyaya Bakur hatin pêkanîn.
Di nav hedefên yekem ên êrîşan de cîberek li Liège ya Belçîkayê, saziyên Cihûyan li Rotterdamê û dibistaneke cihûyan li Amsterdamê hebûn. Li Londonê, ambûlansên saziyeke xêrxwaziyê ya cihûyan hatin şewitandin, di heman demê de êrîş li Parîs û Antwerpê jî li dijî cihên girêdayî DYA û cihûyan hatin kirin. Êrîşa yekem li Almanyayê di 10ê Nîsanê de pêk hat, ku xwaringeha Îsraîlî "Eclipse" ya li Munîhê bû hedef.
"Bi pereyan sûcdarên ciwan hatin bikaranîn"
Der Spiegel ragihand ku piraniya kesên ku êrîş pêk anîne ne endamên rêxistinê bûn, lê belê sûcdarên ciwan bûn ku di berdêla pereyan de hatine bikaranîn. Parêzerê gumanbarê 17 salî yê ku li Belçîkayê hatiye girtin, diyar kir ku muwekîlê wî "bêyî ku bizane çi dike hatiye bikaranîn." Di raporê de hat destnîşankirin ku ciwan di dema êrîşan de hatine fîlmkirin û vîdyoyên wan li ser medyaya civakî hatine weşandin, ev jî tê wê wateyê ku ew ji bo armancên propagandeyê jî hatine bikaranîn.
Di vê navberê de, lêkolînerên amerîkî bi rêya agahderekî di nav rêxistinê de şopa Saadî girtin. Hat ragihandin ku ew kesê ku agahî dabû FBIyê, derbarê planên êrîşan û tora li Ewropayê de îstixbaratên berfireh parve kiribû. Rayedarên amerîkî diyar dikin ku têkiliya Saadî ne tenê bi êrîşên li Ewropayê re, lê herwiha bi hewldanên ji bo pêkanîna çalakiyên bi heman rengî li DYAyê re jî heye.
