Mesrûr Barzanî bi berpirsê UNITADê re civiya: Divê berpirsên DAISê bên dadgehkirin

PeyamaKurd - Serokwezîrê Herêma Kurdistanê Mesrûr Barzanî îro 18ê Adarê li paytext Hewlêrê pêşwazî li Şêwirmendê Taybet ê Sekreterê Giştî û Berpirsê Tîma Navdewletî ya Lêkolînên Tawanên DAIŞê ya Neteweyên Yekbûyî (UNITAD) Christian Ritcher kir.

Serokê tîma UNITED ku dawî li erka wê tê, spasî û pêzanîna xwe û tîma xwe ji bo hevahengî û hevkariya saziyên Hikûmeta Herêma Kurdistanê ligel tîma UNITED di serkeftina karê tîma komkirin, arşîvkirin û dîjîtalkirina belgeyên tawanên terorîstên DAIŞê de, nîşan da.

Serokwezîr Mesrûr Barzanî, girîngiya parastina mafên qurbaniyên destê terorîstên DAIŞê û qerebûkirina wan û berdewamiya piştevaniya navdewletî ji bo dadgehkirina tawankarên DAIŞê anî ziman.

Serokwezîr Barzanî tekez kir ku divê berpirsên DAIŞê ji ber tawanên xwe ku tawanên jenosîd, tawanên cengê û tawanên dijî mirovatiyê ne, bên dadgehkirin. Ji bo vê mebestê jî Hikûmeta Herêma Kurdistanê dê li ser hevkarîya civaka bi navdewletî re berdewam be.