Îran: Heger êrîşek çêbibe dê eniyên nû vebin
Berdevkê Artêşa Îranê Mihemed Ekreminiya, di daxuyaniyekê de derbarê gefên êrîşê yên DYAyê de got ku di rewşa êrîşeke muhtemel de, 'dê eniyên nû bi bikaranîna amûr û rêbazên nû werin vekirin'.
RûpelNews - Berdevkê Artêşa Îranê Mihemed Ekreminiya derbarê gefên êrîşê yên DYAyê yên li dijî Îranê de daxuyanî da. Li gorî raporên di çapemeniya Îranê de, Ekreminiya di dema axaftinekê de li paytexta Îranê, Tehranê, diyar kir ku Îran dê di rewşa êrîşeke muhtemel de tolê hilde.
Berdevkî got, "Eger dijmin careke din bi awayekî ehmeqane tevbigere û bi êrîşkirina li ser Îranê bikeve xefka rejîma Siyonîst, dê bi bikaranîna amûr û rêbazên nû eniyên nû werin vekirin."
Ekreminiya anî ziman ku rêzgirtina li gelê Îranê û mafên yasayî yên welêt "ji bo dijmin yekane rêya derketinê ye".
Giringîdana li ser Tengava Hurmuzê
Ekreminiya, ku diyar kir statuya Tengava Hurmuzê "wê wekî serdema beriya şer nebe", bal kişand ser şiyanên kontrola Îranê yên li herêmê.
Berdevkî her wiha diyar kir ku Hêzên Çekdar ên Îranê pêvajoya agirbestê wekî şert û mercên dema şer dihesibînin û li gorî wê amadekariyên xwe didomînin.
Ekreminiya îdia kir ku Îran nikare were dorpêçkirin û diyar kir ku welatê wî ji bo her senaryoyê amade ye.
