Balafira bombarandinê ya Amerîkî ya B-52 ket

RûpelNews - Balafira bombebarana B-52 Stratofortress a Hêzên Hewayî yên Amerîkayê, demeke kurt piştî rabûna ji Bingeha Hêzên Hewayî ya Edwardsê li Kalîforniyayê ket xwarê. Rayedaran diyar kirin ku qezayê roja Duşemê, li gorî dema herêmî, derdora saet 11:20ê serê sibê qewimiye.

Di daxuyaniyekê de ku ji hêla Bingeha Hêzên Hewayî ya Edwards ve li ser platforma X hate weşandin, hat gotin: "Balafireke B-52 Stratofortress a Hêzên Hewayî yên AQmerîkayê demeke kurt piştî rabûna ji Bingeha Hêzên Hewayî ya Edwards ket. Xizmetên hawarçûnê yekser gihîştin cihê bûyerê û operasyon berdewam in." Rayedarên bingehê diyar kirin ku her agahiyeke nû ku derkeve dê bi raya giştî re were parvekirin.

Rewşa ekîbê ne diyar e

Dîmenên ku ji cihê bûyerê hatine parvekirin, dûmaneke stûr a ku ji devera ku bermahiyên firokeyê lê bûn, radibû nîşan didin. Heta niha derbarê rewşa personelên firokeyê ti daxuyaniyeke fermî nehatiye dayîn.

Endamê Civata Nûneran Vince Fong li ser hesabê xwe yê medyaya civakî parve kir û got, "Ji kerema xwe re tev li min bibin û ji bo ekîba B-52 ya li Bingeha Hêzên Hewayî ya Edwards û tevahiya civaka Edwards dua bikin."

Sembola hêza bombebaranê ya stratejîk a Amerîkayê

Berpirsên li Bingeha Hêzên Hewayî ya Edwards û Hêza Hewayî ya li Pentagonê derbarê qezayê de tu hûrgiliyên zêdetir nedan û amaje bi daxuyaniya destpêkê kirin.
B-52 Stratofortress, ku bi gelemperî bi ekîbeke pênc-kesî dixebite, bi tîmeke ku ji du pîlotan, navîgatorekî radareyê, navîgatorek û efserêkî şerê elektronîk pêk tê, difire.

B-52, ku dikarin çekên atomî jî hilgirin, ji salên 1950î ve wekî pêkhateyeke sereke ya hêza bombebaranê ya stratejîk a Amerîkayê xizmet dikin. Her çend niha 76 B-52 di envantera Hêza Hewayî ya Amerîkayê de hebin jî, bernameyên berfireh ên nûjenkirinê hene ji bo ku ev firoke bi salan di pêş de di xizmetê de bimînin.