Artêşa Amerîka: Li Îranê gelek hedef hatin bombebarankirin
Fermandariya Hêzên Navendî ya DYAyê (CENTCOM) ragihand ku pêla herî dawî ya êrîşên hewayî yên li dijî Îranê bi dawî bûye. Di daxuyaniyê de hat destnîşankirin ku operasyon wek bersiv ji bo êrîşên ku tê de du leşkerên amerîkî li Urdunê jiyana xwe ji dest dan, hatine kirin.
RûpelNews - Li gorî daxuyaniyeke ku ji aliyê CENTCOMê ve bi rêya platforma medyaya civakî X hate dayîn, êrîşên ku heşt şevan li pey hev dewam kirin, tesîsên çavdêriya peravê ya leşkerî û parastina hewayî yên Îranê, hêmanên hêzên wê yên deryayî û herwiha herêmên depokirina mûşek û dronan kirin armanc.
Di daxuyaniyê de hat ragihandin ku pêla herî dawî ya êrîşan hatiye temamkirin û her wiha hat destnîşankirin ku operasyonên bi armanca lawazkirina kapasîteyên leşkerî yên Îranê dê berdewam bikin. Her wiha hat ragihandin ku wekî bersivdayîna êrîşên li Urdunê ku tê de du leşkerên amerîkî jiyana xwe ji dest dan, hedefên girêdayî Supaya Pasdaran a Îranê hatine lêdan.
CENTCOM her wiha ragihand ku nêzîkî 50 hezar leşkerên amerîkî li seranserê Rojhilata Navîn bi cih bûne.
Di êrîşa li Urdunê de du leşkerên amerîkî jiyana xwe ji dest dabûn
Di daxuyaniyekê de ku rojek berê hatibû weşandin, CENTCOM ragihandibû ku di 17ê Tîrmehê de, dema ku hêzên amerîkî û hevalbend li dijî êrîşên mûşekên balîstîk û dronên Îranê li Urdunê derdiketin, du leşkerên amerîkî jiyana xwe ji dest dane.
Di heman daxuyaniyê de hatibû destnîşankirin ku leşkerekî amerîkî winda ye, di heman demê de çar leşkerên ku ji bo dermankirinê rakiribûn nexweşxaneyên Urdunê, hatine terxîskirin û personelên din ên ku bi birînên sivik bûbûn piştî kontrolên bijîjkî vegeriyane ser karê xwe.
Piştî vê geşedanê, artêşa Amerîkayê ragihand ku wê wek bersiv li dijî êrîşên li Urdunê, ku tê de du leşkerên wê jiyana xwe ji dest dan, êrîşên nû yên hewayî li dijî Îranê pêk aniye.
