Serok Barzanî: Şengal di bîra Kurdistanê de birîneke nayê jêbirin e
Serok Mesûd Barzanî ji bo bîranîna 12emîn a êrîşên DAIŞê li ser Êzidiyan li Şengalê, daxuyaniyeke nivîskî weşand. Barzanî diyar kir ku komkujiya Êzidiyan wek "birîneke mayînde" di bîra Kurdistanaê de dijî û destnîşan kir ku ev bûyer beşek ji zincîreyeke komkujiyan e ku di dirêjahiya dîrokê de li dijî gelê kurd hatine kirin.
RûpelNews - Barzanî tekez kir ku Êzidî ji ber nasnameya xwe ya kurdî, eslê xwe yê nijadî û baweriyên xwe yên olî ji aliyê DAIŞê ve rastî jenosîdê hatine.
Spasiya hêzên Pêşmerge û koalîsyonê kir
Di peyama xwe de, Barzanî rêz li hêzên Pêşmerge yên ku çiyayê Şengal parastin, pêşveçûna DAIŞê sekinandin û piştre bi şikandina dorpêçê di rizgarkirina Şengalê de rolek lîstin girt û bîranîna kesên ku di şer de şehîd ketibûn bi rûmet kir.
Barzanî her wiha spasiya Hêzên Ewlekariya Kurdistanê, gelê Kurdistanê yê ku piştgirî da Ezîdiyan, û hêzên koalîsyona navneteweyî kir ku di şerê li dijî DAIŞê de piştgirî dan hêzên Pêşmerge.
"Ez ê piştgiriya daxwazên Ezidiyan bidomînim"
Barzanî, ku diyar kir ku ew ê di piştgiriya daxwazên rewa yên civaka Êzidî de berdewam be, bang li Êzidiyan kir ku yekgirtî tevbigerin û bi hêvî li pêşerojê binêrin.
Barzanî, ku diyar kir rewşa heyî ya li Şengalê nayê qebûlkirin, got ku divê pêvajoyek were danîn da ku misoger bibe ku Êzidî bi rûmet û bi ewlehî vegerin ser axa bav û kalên xwe, û zirar û êşên ku wan kişandine werin telafîkirin.
Wî rêz li şehîdan girt
Barzanî peyama xwe bi rêzgirtina li şehîdên Şengalê û yên ku di têkoşîna ji bo azadiya Kurdistanê de jiyana xwe ji dest dane, bi dawî anî. Wî got: "Hezaran silav ji bo giyanên pak ên şehîdên Şengalê û yên ku di rêya azadiya Kurdistanê de ketine."
