Pompeo bersiva gefên Îranê da: ‘Kustina Suleymanî biryareke bas û rast bû’

PeyamaKurd – Serokomarê Îranê Îbrahîm Reîsî doh 4ê Çileyê 2022yan di merasîmeke salvegera kuştina Qasim Suleymanî de, gotibû divê Serokê berê yê Amerîkayê Donald Trump û Wezîrê Derve yê berê Mike Pompeo bi sedema berpirsiya kuştina Suleymanî werin dadgehkirin û cezakirin û gefa kuştina wan xwaribû.

Mike Pompe di hevpeyvîneke ligel Fox Newsê de bersiva Reîsî da û got, “Îrana ku piştevana herî mezin a terorê ye min û serok Trump wekî tolhildan bi kuştinê tehdîd dike. Pirsgirêkeke rasteqîn a ewlehiyê heye.”

Pompeo di berdewamê de jî diyar kir ku heger ew vegerin ser dema fermana kuştina Suleymanî jî wî dîsa jî di fermana êrîşê de ti guhertin nedikir û got, “Me berevaniya Amerîkayê dikir. Suleymanî di komploya dijî Amerîkayê de xwedî roleke aktîf bû. Ji bo em piştrast bin ku ti amerîkîyek neyê kuştin, me destwerdana leşkerî kir. Ev biryareke baş û rast bû.”

Pompeo herwiha rexne li rêveberiya serokê Amerîka Joe Biden jî girt û daxwaz kir, li hember gefên Îranê ewlehiyê misoger bikin, ji ber ku gefên Îranê têne wê wateyê ku wê sûîqestan bikin.