Partî û rêxistinên Kurdistanî dê bi çalakiyekê Îranê şermezar bikin
Partî û rêxistinên Kurdistanî dê li Amedê bi çalakiyekê şehîdkirina Pêşmergeyan Rojhilatê Kurdistanê şermezar bikin û bertekê nîşanî êrişên Îranê yên li ser Herêma Kurdistanê bidin.
RûpelNews - Ji aliyê hêzên Îranê ve di 17ê Tîrmehe de bi dron û mûşekan êrişî Hewlêr û Silêmaniyê hat kirin. Dezgeha Ewlehiyê ya Herêma Kurdistanê ragihand ku bi 7 mûşekan êrişî Silêmaniyê hatiye kirin.
9 Pêşmerge şehîd ketin
Komeleya Şoreşger a Zehmetkêşên Kurdistanê jî eşkere kir ku di êrişên li Silêmaniyê de 9 Pêşmergeyên wan şehîd ketine û 3 Pêşmerge jî birîndar bûne.
Înîsiyatîfa Neteweyî ya Kurdistanê, Pêlkurd, Partiya Sosyalîst a Kurdistanê (PSK) Partiya Welatparêzên Kurdistanê (PWK) Vejîn û kesayetên serbixwe yên Kurdistanî di bin navê Komisyona Hewldana Yekîtîya Neteweyî ya Kurdistanê de daxuyanîyek belav kir.
20ê Tîrmehê dê li dijî Îranê çalakî bê kirin
Komîsyonê ragihand ku dê li Amedê di 20ê Tîrmehê roja dûşemê li Cemîyeta Rojnamegeran saet di 13.00an de bi çalakîyekê êrişên Îranê yên li ser gelê kurd şermezar bikin û şehîdên Rojhilatê Kurdistanê bi bîr bînin.
Komîsyonê bang li xelkê Kurdistanê kir ku beşdarî çalakiyê bibin û bi piştgiriya xwe dengê xwe bilind bikin.
