Nêçîrvan Barzanî û Macron li ser Mexmûrê axivîn
Serokê Herêma Kurdistanê Nêçîrvan Barzanî û Serokomarê Fransayê Emmanuel Macron li ser êrîşa Mexmûrê axivîn ku tê de leşkerekî Fransayê hatibû kuştin.
RûpelNews - Serokatiya Herêma Kurdistanê ragihand ku Nêçîrvan Barzanî û Serokomarê Fransayê Emmanuel Macron bi rêya telefonê axivîn.
Nêçîrvan Barzanî êrişa ku li Mexmûrê li dijî baregeheke hevbeş a Pêşmerge û hêzên Fransayê yên di çarçoveya Hevpeymana Navneteweyî de pêk hatibû bi tundî şermezar kir.
Şeva borî komên çekdar êrişî Eniya 6 a Pêşmergeyan a li Mexmûrê kiribû û di encamê de leşkerekî Fransayê canê xwe ji dest dabû û 6 leşkerên din jî birîndar bûbûn.
Nêçîrvan Barzanî ji ber mirina leşkerê fransî sersaxî li Macron û malbata leşkeri kir.
Nêçîrvan Barzanî diyar kir ku wî leşkerî ji bo parastina asayîşê û têkoşîna li dijî terorê li Herêma Kurdistanê canê xwe feda kiriye.
‘Divê hikûmeta Îraqê komên çekdar ceza bike’
Serokê Herêma Kurdistanê ji ber piştgiriya Fransayê ya ji bo Îraq û Herêma Kurdistanê spasiya Macron kir.
Nêçîrvan Barzanî amaje bi wê yekê kir ku pêwîst e hikûmeta Îraqê erkê bîne cih û rê li ber êrişên van komên çekdar bigire.
Nêçîrvan Barzanî destnîşan kir ku divê ew komên çekdar werin cezakirin da ku berjewendiyên welêt û pêwendiyên bi civaka navneteweyî re nekevin metirsiyê.
Li gorî daxuyaniya Serokatiya Herêma Kurdistanê, Macron jî ji ber hevxemiya Nêçîrvan Barzanî û gelê Kurdistanê spasiya wî kiriye.
Macron da zanîn ku piştgiriya Fransayê ya ji bo Îraq û Herêma Kurdistanê didome.
Barzanî û Macron di axaftina xwe de mijara rûdanên dawî yên şer û bandorên wê yên li ser herêmê jî gotûbêj kirin.
Li gorî daxuyaniyê, di axaftinê de hatiye xwestin ku ji bo rawestandina şer û çareserkirina pirsgirêkan bi awayekî aştiyane hewl bên zêdekirin.
