Nêçîrvan Barzanî besdarî dengdana "Alîgirê Salê" ya FIFAyê bû

PeyamaKurd – Serokê Herêma Kurdistanê Nêçîrvan Barzanî piştgirî da Zaxo SK, ku ji bo Xelata Baştirîn Alîgirê FIFAyê ya 2025an hatibû berbijêrkirin.

Di daxuyaniyekê de roja Yekşemê, 16ê Mijdarê, Nêçîrvan Barzanî diyar kir ku ew piştgirîya alîgirên Zaxo SK dike da ku xelata Baştirîn Alîgirê Cîhanê ya 2025an bi dest bixin.

Serokê Herêma Kurdistanê bang li hemû Kurdan kir, bêyî ku cihê wan li ku be, ku beşdarî dengdana ku ji hêla FIFAyê ve hatî organîzekirin bibin û piştgirîya alîgirên Zaxoyê bikin.

Nêçîrvan Barzanî herwiha spasiya FIFAyê kir ji bo hilbijartina alîgirên Zaxoyê wekî yek ji sê berbijêrên cîhanê.

Federasyona Navneteweyî ya Komeleyên Futbolê (FIFA) roja Pêncşemê, 6ê Mijdara 2025an, berbijêrên Xelata Baştirîn Alîgirê 2025an ragihand.

Alîgirên Zaxo SK, digel alîgirên ji du klûbên werzîşê yên din, ji bo xelatê hatin berbijêrkirin.

Di sezona borî de, alîgirên Zaxoyê berî maça xwe ya li dijî Hudud SK di 13ê Gulanê de nêzîkî 30,000 pêlîstokên pitikan avêtin nav stadyûmê. Piştre wan hemû pêlîstok berhev kirin û ew bexşandin zarokên nexweş.

Li gorî daxuyaniya FIFAyê, avêtina pêlîstokan nav stadyûmê giyanekî mirovî nîşan dide ku ji aliyê civaka werzîşê ya li Kurdistan, Iraq û Asyayê ve tê naskirin.