Macron peyamek li ser aloziyên li Derya Spî belav kir

PeyamaKurd – Pirsgirêkên di navbera Tirkiye û Fransayê de berdewam dikin. Serokomarê Fransayê Emmanuel Macron li ser hesabê xwe yê Twitterê di derbarê krîz û aloziya li Derya Spî û hewlên çareserkirina wê krîzê de, bi zimanê Tirkî peyamek belav kir.

Emmanuel Macron di twîta xwe de bal kişand ser civîna li gireva Korsîkayê kir û tekez kir ku peyama wan ji bo Tirkiyê zelal e û divê Enqere dest bi danûstandinên bi berpirsyarane bike ku pirsgirêk bêne çareserkirin.

Herwiha Emmanuel Macron da zanîn, “Ev bang ya Parlamentoya Ewropayê kir” û diyar kir ku li gor rewşa heyî ew peyama wan hatiye bihîstin.

Serokomarê Fransayê li gireva Korsîkayê bi amadebûna Komara Qibris û welatên endam di Foruma Yekîtiya Welatên Başûrê Ewropayê de civînek encam dabû û gotarek pêşkêş kiribû.

Macron di wê gotara xwe de gotibû, Tirkiye li navçeyê êdî ne hevbeşek e “pirsgirêka me li gel Erdogan ne li gel xelkê Tirkiyê” û “divê wek Yekîtiya Ewropa êdî peyameke zelal ji Tirkiyê re bê dayîn.”

Wezareta Derve ya Tirkiyê bersiv dabû van gotinên Serokomarê Fransayê û Macron bi êrişkirina bo ser Tirkiyê tohmetbar kiribû.

Herwiha Wezareta Derve ya Tirkiyê gotibû, “Serokomarê Fransayê bi helwesta xwe ya netewperest aloziyan zêdetir dike û berjewendiyên Ewropa û Yekîtiya Ewropayê dixe jêr metirsiyê.”