Li Sûriyê piştî kurdan, tirkmen jî ne razî ne
Digel ku daxwazên kurdan ên ji bo perwerdehiya bi zimanê kurdî li Sûriyê û Rojava wekî mijareke sereke dimînin, Tirkmenan jî derbarê mafên zimanî û çandî de nerazîbûna xwe li hember hikûmeta Şamê anîn ziman.
RûpelNews - Di meş û xwepêşandanên ku di van çend rojên borî de li Rojava hatin lidarxistin de, kurdan diyar kirin ku ew qebûl nakin ku zimanê kurdî tenê wekî derseke bijarte were fêrkirin û daxwaz dikin ku perwerde bi zimanê kurdî be.
Tirkmen jî tekezî li ser ziman û nasnameyê dikin
Serokê Encûmena Tirkmenên Sûriyê û Endamê Parlamentoyê yê Helebê Abdurrahman Mustafa, di daxuyaniyekê de ku li ser hesabê xwe yê Xê parve kir, her wiha banga naskirina mafên zimanî û çandî kir.
Mustafa tekez kir ku ji bo Tirkmenên Sûriyê, zimanê Tirkî ji dersekê di mifredatê de pir wêdetir e, û destnîşan kir ku ziman ji bo nasname, çand û "cihê Tirkmenan di Sûriyeya nû de" xwedî girîngiyeke jiyanî ye.
Di parvekirina xwe de, Mustafa diyar kir: "Parastina ziman û nasnameya me, îfadeya biryardariya me ye ku em wek hevparekî wekhev, bibandor û bihêz di Sûriyeya nû de hebin."
"Divê mafên me bên parastin"
Mustafa, ku destnîşan kir hêviyên Tirkmenan zelal in, got ku divê mafên zimanî û çandî yên Tirkmenan bên naskirin û bi awayekî mayînde bên parastin.
