Li Rojavayê Kurdistanê ‘Dibistana Malê’ dest bi perwerdê dike

PeyamaKurd – Li Rojavayê Kurdistanê û Rojhilatê Sûriyê ku ji aliyê Rêveberiya Xweser ve tê birêvekirin, ji ber metirsiya belavbûna vîrusa koronayê 14 Adarê dibistan ketibûn betlaneyê û piştre jî rêkar û qedexeyên ji bo pêşîgirtina belavbûna Covid-19 hatibûn ragihandin.

Li ser vê yekê Desteya Perwerde û Fêrkirinê ya Rêveberiya Xweser ji bo xwendekar ji waneyên xwe nemînin rêbazeke nû ya perwerdeyê dixe meriyetê ku navê wê ‘Dibistana Malê’ ye.

Niha li Rojavayê Kurdistanê û Rojhilatê Sûriyê 4 hezar û 317 dibistan hatine girtin û perwerdeya 789 hezar û 225 xwendekaran rawestiyaye.

Ji bo xwendekar ji perwedeyê qut nebin, Rêveberiya Xweser a Bakur û Rojhilatê Sûriyê sîstemek bi navê "Dibistana Malê" çêkiriye ku niha xebat li ser tê kirin daku bi rêya kanalên televîzyonê û malperên girêdayî Desteya Perwerde û Fêrkirinê dê wane werin dayîn.

Li gorî zanyariyan, niha mamoste waneyan bi dîmen tomar dikin û piştre dê li ser kanala Rojava TV werin weşandin ku wê wane ji pola yekê heta pola 11an werin dayîn.