Li Mehabad û Îlamê du kurd hatin girtin
Hate ragihandin ku hêzên Îranê li parêzgehên Mehabad û Îlamê yên li Rojhilatê Kurdistanê du welatiyên kurd desteser kirine. Derbarê cihê girtîgehê yê Ali Resûlnejad û Milad Alaeinasab û tawanên li dijî wan, ti agahî nehatiye dayîn.
RûpelNews - Rêxistina Mafên Mirovan a Hengaw û Ajansa Nûçeyan a Çalakvanên Mafên Mirovan (HRANA) ragihandin ku Ali Resûlnejad ê 32 salî roja Çarşemê 26ê Tebaxê li cihê karê xwe li Mehabadê hate girtin.
Li gorî raporan, efserên Rêxistina Îstixbaratê ya Sûpaya Pasdaran, Resûlnejad li cihê karê wî bêyî pêşkêşkirina ti biryara dadgehê girtine û ew birine cihekî nenas.
Hate destnîşankirin ku hewldanên malbata Resûlnejad ji bo zanîna cihê wî bêencam mane. Derbarê sedemên girtina wî an jî tawanên muhtemel ên li dijî wî de ti agahî nehat dayîn.
Mîlad Alaeinasab, niştecîhê 30 salî yê ji Dereşehr a li Parêzgeha Îlamê, sibeha Pêncşemê, 27ê Tebaxê, di dema operasyoneke li ser mala malbata wî de hate desteserkirin.
Hengawê ragihand ku hêzên ewlehiyê di dema desteserkirinê de tundûtûjiyeke giran bi kar anîne û ti biryara girtinê nîşan nedane. Her çend HRANA nasnameya Alaeinasab û roja desteserkirina wî piştrast kiribe jî, wê behsa îdiayên tundûtûjiyê nekir.
Ajansa ku Alaeinasab girt, cihê ku ew lê tê ragirtin û tohmetên li dijî wî nehatine eşkerekirin. Her wiha hat destnîşankirin ku ji hewildanên malbata wî yên ji bo wergirtina agahiyan ji rayedarên têkildar re, ti bersiveke zelal nehatiye dayîn.
