Kelegerma havînê bandoreke mezin li Fransayê kiriye
Ji ber pêla germê ya ku bandorê li seranserê Fransayê dike, asta hişyariyê li 60 parêzgehan rengê pirteqalî hate bilindkirin. Ji ber ku germahî li seranserê welêt ji navînîya demsalî bilindtir bûye, rayedarên têkildar dest bi cîbicîkirina rêzeyek tedbîran kirine.
RûpelNews - Di daxuyaniyekê de ku ji aliyê Servîsa Meteorolojiyê ya Fransayê (Météo-France) ve hat weşandin, hat ragihandin ku ji ber pêla germê ya ku bandorê li seranserê welêt dike, di 60 parêzgehan de hişyariya porteqalî hatiye ragihandin. Digel ku tê payîn germahî li hin deveran heta 41 pileyî bilind bibe, tê pêşbînîkirin ku pêla germê heta hefteya bê jî bidome.
Yekîneya krîzê dicive
Hikûmeta Fransayê jî wek bertek li hember pêla germê tedbîr girtine. Hat ragihandin ku dê civîneke awarte ya yekîneya krîzê ya nav-wezaretan were lidarxistin, ku Serokwezîr Sébastien Lecornu û 14 wezîr jî dê beşdar bibin.
Tedbîrên nû li Parîsê
Li paytext Parîsê jî ji bo têkoşîna li dijî germahiya zêde tedbîrên nû hatin girtin. Encûmena Bajarê Parîsê di seranserê hefteyê de ji bo niştecihan gelek însiyatîf pêk anîne.
Li gorî vê yekê, hat ragihandin ku park û baxçeyên bajêr dê 24 saetên rojê, heft rojên hefteyê vekirî bimînin. Wekî din, her çend di demên diyarkirî de avjenî li Kanaala Saint-Martin destûrdayî be jî, demjimêrên vekirina hewzên avjeniyê yên giştî jî hatine dirêjkirin.
Şaredarê Parîsê, Emmanuel Grégoire, ragihand ku dê hezar û 200 baqokan ji bo bikaranîna li dibistanan werin kirîn û ku tedbîr li seranserê bajêr hatine xurtkirin.
