Hunermendê kurd Elî Mansûr li Amûdê koça dawî kir
Hunermendê kurd Elî Mansûr, piştî têkoşîneke dirêj a li dijî nexweşiyê, duh sibeha Înê (10ê Nîsanê) di 60 saliya xwe de li bajarê Amûdê koça dawî kir.
RûpelNews - Koça dawî ya hunermend di nav derdorên hunerî û çandî yên herêmê de bû sedema xemgîniyeke mezin.
Jiyan û têkoşîna hunerî
Elî Mansûr di temenekî biçûk de dest bi rêwîtiya xwe ya hunerî kir û di nav komên "Newroz" ên li bajarên Amûdê, Qamişlo û Hesekê de cîh girt. Armanca wî ya sereke parastina mîrat û çanda kurdî ya li herêma Cizîrê bû.
Di sala 1982an de, Mansûr ligel hejmarek hunermendan di damezrandina koma "Mehabad" de beşdar bû. Vê komê bi berhemên xwe êş, daxwaz û dozên neteweyî yên civaka kurd dianî ziman. Her wiha di sala 1986an de bû yek ji damezrînerên koma "Agirî" û di nivîsandin û amadekirina awazên stranên wê komê de roleke berbiçav lîst.
Hunermendekî welatparêz û dilsoz
Elî Mansûr bi hunera xwe ya şoreşgerî û pabendbûna xwe ya bi doza Kurd re dihat naskirin. Ji ber helwest û stranên xwe, wî gelek caran zext û astengiyên rejîma Baasê dîtin û ji ber straneke xwe hat girtin. Tevî hemû zehmetiyan, wî heta dawiya temenê xwe xizmeta hunera Kurdî kir.
Bi koçkirina wî, hunera Kurdî stûneke xwe ya giring winda kir. Tê payîn ku cenazeyê hunermend Elî Mansûr li bajarê Amûdê, ku lê ji dayik bûye, were veşartin.
