Biryara Almanyayê tê rexnekirin: ‘Divê piştgiriya kurdan kêm nebe'
Biryara Almanyayê ya girtina kampa xwe ya leşkerî ya li Hewler a paytexta Herêma Kurdistanê, heta dawiya Îlonê, li Berlînê bûye sedema nîqaşeke siyasî. Biryara Wezîrê Parastinê Boris Pistorius hem ji aliyê parlamenterên hikûmetê û hem jî yên opozîsyonê ve rastî rexneyan hatiye, di heman demê de ev yek ku parlamen ji pêvajoyê re pêşwext nehatibû agahdarkirin, bûye xala sereke ya rexneyan.
RûpelNews - Li gorî plana Wezareta Parastinê ya Almanyayê, artêş dê bi temamî ji kampa meydanî ya li Hewlêrê vekişe. Tenê hejmareke sînordar a leşkerên alman dê li herêmê bimînin û ev personel dê piştgiriya şêwirmendiyê ji bo hêzên ewlehiyê yên herêmî bidomînin.
Rastiya ku biryar tenê berî ku parlamento bikeve betlaneya xwe ya havînê bi rêya telefonê ji parlamenteran re hat ragihandin, bû sedema fikaran. Endamên Komîteya Parastinê hikûmet rexne kirin ku bi mehan pirsên wan ên derbarê paşeroja mîsyonê li Hewlêrê bêbersiv hiştine, lê dîsa jî bi biryareke ji nişka ve girtina baregehê ragihandiye.
Ji bilî opozîsyonê, parlamenterên ji partiyên desthilatdar jî anîn ziman ku Wezareta Parastinê parlament bi têra xwe agahdar nekiriye.
CDU: Vekişîn dê bibe peyameke kujende
Cîgirê Rêveberê Koma CDUyê Norbert Röttgen, diyar kir ku pêwîst e Almanya ji bo paşeroja xwe ya li Iraqê nexşerêyeke zelal diyar bike û lê zêde kir: "Vekişîn ne di berjewendiya Almanyayê de ye û dê peyameke gelek neyînî di her alî de bişîne."
Cîgira Rêvebera Koma SPDê Siemtje Möller jî hikûmet rexne kir û got ku divê biryarên stratejîk ên bi vî rengî pêşwext bi parlamenê re bên parvekirin.
Partiya Kesk: Divê kurd bi tenê neyên hiştin
Parlamentera Partiya Kesk Sara Nanni, bang li hikûmeta alman kir ku di demek nêz de ragihîne ku piştgiriya ji bo hêzên kurd li Herêma Kurdistanê dê berdewam bike.
Nanni amaje pê kir ku gefeke DAIŞê bi temamî ji holê nehatiye rakirin, destnîşan kir ku rêxistin hewl dide çekdarên nû peyda bike û ji ber vê yekê girîngiya berdewamiya piştgiriya ji bo hêzên kurdî tekez kir.
Çima artêş li Hewlêrê bû?
Almanyayê di sala 2015an de piştî pêşveçûna bilez a DAIŞê li Iraqê, rahênerên leşkerî şandibûn Hewlêrê. Li şûna ku bikeve şerê rasterast, artêşê perwerde û piştgiriya şêwirmendiya leşkerî da hêzên Pêşmerge. Hikûmeta Berlînê di heman demê de bi peydakirina çekan ji hêzên Pêşmerge re, piştgirî da têkoşîna li dijî DAIŞê.
Raporê destnîşan kir ku hebûna leşkerî ya navneteweyî, bi taybetî li kêleka hêzên di bin serokatiya DYA'yê de, ji bo parastina aramiyê li Hewlêr û derdora wê beşdar bûye.
Hevsengiya hêzê li herêmê ji nû ve tê nirxandin
Di raporê de her wiha hat destnîşankirin ku tevî ku Hikûmeta Herêma Kurdistanê xwedî avahiyeke xwe ya îdarî ye, statuya wê ya dewleteke serbixwe nîne. Wekî din, hat ragihandin ku operasyonên leşkerî yên Tirkiyeyê yên li dijî PKKê li bakurê herêmê, di nav wan faktorên ku bandorê li hevsengiya ewlehiyê dikin de ne.
Biryara kêmkirina hebûna artêşê li Hewlêrê bi awayekî berfireh, nîqaşên derbarê rola pêşerojê ya Almanyayê li Iraqê û ka gelo piştgiriya ji bo hêzên Kurd dê bidome an na, ji nû ve gur kir. (Der Spiegel)
