Bexdayê sedema civîna du alî ya Hewlêrê askere kir

PeyamaKurd - Wezareta Derve ya Iraqê ragihand ku armanca serdana lijneya aborî ya federal ya ji bo Hewlêrê ew bûye ku li ser çareserkirina pirsgirêkên heyî yên di navbera Iraq û Herêma Kurdistanê de parvekirina nêrînan bûye.

Li paytexta Herêma Kurdistanê Hewlêrê, îro berî nîvro civîna lijneya aborî ya Iraq û ya Herêma Kurdistanê pêk hat. 

Di civînê de Serokwezîrê Herêma Kurdistanê Mesrûr Barzanî serokatiya lijneya aborî ya Herêma Kurdistanê kir û Cîgirê Serokwezîrê Iraqê û Wezîrê Derve yê Iraqê Fuad Husên jî serokatiya lijneya aborî ya Iraqê kir. 

Wezareta Derve ya Iraqê di derbarê civîna lijneya aborî ya Iraq û ya Herêma Kurdistanê de daxuyaniyek belav kir.

Di daxuyaniyê de hate gotin ku armanca civînê ew e ku di navbera hikûmeta federal û hikûmeta Herêma Kurdistanê de li ser mijarên cuda û bi taybetî jî di warê aborî û darayî de lihevkirinek bê kirin.

Di daxuyaniyê de wiha hate gotin: "Civîn, wê du rojan bidome. Di çarçoveya hevdîtinan de, rêze danişînên teknîkî û hevkariyê yên taybet ên bi armanca entegrekirina nêrînan û gihiştina çareseriyeke bi bandor, wê bên lidarxistin."