Li Tirkiyeyê di girtîgehan de ji zêdeyî 433 hezar kes hene

RûpelNews - Rêveberiya Giştî ya Girtîgehan û Navendên Binçavkirinê ya Wezareta Dadê ya Tirkiyeyê, hejmara kesên di girtîgehan de ne ya herî dawî weşand.

Li gorî daneyên hatine weşandin, li seranserê Tirkiyeyê di girtîgehan de bi giştî 433 hezar û 520 kes hene ku ji wan 368 hezar û 293 girtiyên mehkûmkirî û 65 hezar û 227 girtiyên binçavkirî ne.

Ji wan 412 hezar û 76 kes mêr in 21 hezar û 444 jin in.

Hejmar ji kapasîteya heyî zêdetir e

Kapasîteya giştî ya 402 girtîgehên li seranserê Tirkiyeyê weke 304 hezar û 278 kes hatiye tomarkirin. Dema ku hejmara niha ya girtiyan li ber çavan bê girtin, eşkere ye ku nifûsa giştî ya girtîgehan ji sînorê kapasîteyê bi 129 hezar û 242 kesî (nêzîkî ji sedî 42.5) zêdetir e û rêjeya dagirtinê gihîştiye ji sedî 142.5.

Bi giştî 4 hezar û 636 zarok û 6 hezar û 869 kesên pîr û kal di girtîgehê de dimînin.