Tirkiye li ser keştiya rastî êrîşa dronê hatî daxuyanî da

RûpelNews - Doh êvarî (28ê Gulanê) li keştiya bi ala Vanuatuyê, ku barê ziwa ji bendera Odesa ya li Ukraynayê vediguhast Tirkiyeyê, êrîşek bi dronê hat kirin.

Di daxuyaniyekê de derbarê mijarê de, Wezareta Karên Derve ragihand ku di êrîşê de du welatiyên Tirkiye birîndar bûne. Wezaretê tekez kir ku Konsulxaneya Giştî ya Odessayê rewşê dişopîne.

Di daxuyaniya Wezaretê de wiha hat gotin: "Em hişyariya xwe ji hemû aliyên pêwendîdar re dubare dikin ku xwe ji gavên ku dikarin bibin sedema alozbûneke bêkontrol a pevçûnê dûr bixin."

"Bangên me derbasdar in"

Daxuyaniya Wezareta Karên Derve de ev tişt hatin gotin:

"Hatiye zanîn ku şeva borî (28ê Gulanê), keştiyeke bi xwediyê wê tirk û bi alaya Vanuatuyê, ku barê hişk ji Bendera Odessayê ya li Ukraynayê vediguhast bo Tirkiyeyê, ji aliyê dronekê ve rastî êrîşê hat û du welatiyên me yên di nav tîmê de bi sivikî birîndar bûn.

Rewşa welatiyên me yên li ser keştiyê ji aliyê Konsulxaneya me ya Giştî ya li Odessayê ve ji nêz ve tê şopandin.

Fikarên me yên derbarê rîsk û gefên ku ji ber tûjbûna dawî ya girêdayî şerê li Deryaya Reş li ser herêma me peyda dibin, û herwiha hişyariyên me yên derbarê bandorên neyînî yên muhtemel ên li ser welatê me, di her astê de ji hemû aliyên pêwendîdar re tên ragihandin.

Em hişyariya xwe ji hemû aliyên têkildar re dubare dikin ku xwe ji avêtina wan gavên ku dikarin bibin sedema gurkirineke bêkontrol a pevçûnê dûr bigirin.

Bangên me yên ji bo parastina ewlehiya keştiyên sivîl li Deryaya Reş û ji bo bidawîkirina pevçûnê bi rêya danûstandinan, derbasdar in."