Erka qeyûmê Mêrdînê hat dirêjkirin

RûpelNews - Tevî banga Serokê MHPê Devlet Bahçelî ya 'bila Ahmet vegerin ser erkên xwe', dema qeyûmê yê Şaredariya Mezin a Mêrdînê hatiye dirêjkirin.

Li gorî biryara Wezareta Karên Navxwe, dema Parêzgarê Mêrdînê Tuncay Akkoyun, ku wek qeyûmê Şaredariya Mezin hatibû erkdarkirin, heta 4ê Tîrmeha 2026an hatiye dirêjkirin.

Ji ber vê yekê, rêveberiya qeyûmê li Şaredariya Mezin a Mêrdînê dê di erka xwe ya heyî de berdewam bike.

Hatibû îdiakirin ku ew dê di gulanê de vegerin ser erkê xwe

Rojnamevan Sînan Burhan ku kesayetekî nêzîkî desthilatdarê ye, îdia kiribû ku Şaredarê Mêrdînê Ahmet Turk û Şaredarê Esenyurtê Ahmet Ozer, ku ji karên xwe hatibûn dûrxistin û li şûna wan qeyûm hatibûn danîn, dê di meha gulanê de vegerin ser postên xwe.

Serokê MHPê Devlet Bahçelî di axaftineke xwe ya di 3ê Sibatê de gotibû: "Biryara me zelal e heta ku Anatolya aramiyê bibîne, Ocalan hêviyê bibîne, Ahmet vegerin ser erkên xwe û Demirtaş vegere malê."

Di hilbijartinên herêmî yên 31ê Adara 2024an de, Ahmet Turk bi rêjeya ji sedî 57.4 wek Şaredarê Mêrdînê hatibû hilbijartin. Di Mijdara heman salê de, Ahmet Turk ji kar hate dûrxistin û li şûna wî Parêzgarê Mêrdînê wek qeyûm hate tayînkirin. Şaredarî nêzîkî sal û nîvê ye di bin rêveberiya qeyûm de ye.