'Eger Amerîka nesekine Îran dê li Ewropayê jî bixe'

RûpelNews - Rojnameya Financial Times (FT) a ku navenda wê li Brîtanyayê ye ragihand ku Îran li ber wê yekê difikire ku heke pevçûn zêdetir bibe, baregehên leşkerî yên Amerîkayê yên li Ewropayê bike armanc.

Li gorî raporê, ku du kesên nêzîkî hikûmeta Îranê weke çavkanî nîşan da rêveberiya Tehranê ji bo êrîşên li ser bingeha leşkerî ya Amerîkayê li başûrê rojhilatê Ewropayê nirxandinekê kir.

Çavkaniyekê ku ji rojnameyê re axivî got: "Eger Amerîka ranweste, Îran dê bi her awayî xwe biparêze, ji herêmê wêdetir biçe û li Ewropayê jî bixe."

Bingeha Hewayî ya Bezmerê ku Bulgaristanê destûr daye balafirên dagirtina sotemeniyê yên Amerîkayê ku bi kar bînin, her weha wekî hedefek hate destnîşankirin.

Yek ji çavkaniyan diyar kir ku eger DYA êrîşeke din pêk bîne, Qibris jî di nav hedefên potansiyel de ye.

Adara borî, dronekê êrîşî bingeheke hewayî ya Brîtanî li Qibrisê kir.

Berpirsekî NATO yê ku ji Reutersê re peyivî li ser îdiaya Financial Timesê şîroveyeke wiha kir: "NATO amade ye ku bersiva her gefê bide û dê her dem her tiştê ku ji bo parastina hemû hevalbendên xwe pêwîst be bike."

Di raporê de her wiha ji devê pisporên leşkerî hat gotin ku Îran xwedî moşekên ku dikarin bigihîjin hin deverên Ewropaya Başûr û Başûrê Rojhilat e, lê dibe ku bandor û rastbûna wan di mesafeyên dirêjtir de kêm bibe.