Yekîtiya Ewropayê 890 milyon euro ceza da Google
Komîsyona Yekîtiya Ewropayê ragihand ku li ser şîrketa teknolojiyê Google ji ber binpêkirina Qanûna Bazarên Dîjîtal cezayek bi tevahî 890 milyon euro hatiye birîn.
RûpelNews - Komîsyona Yekîtiya Ewropayê du biryarên cezayê yên cuda derxistin û biryar da ku Google berpirsiyariyên xwe yên di bin Qanûna Bazarên Dîjîtal de bin pê kir.
Di daxuyaniyeke Komîsyonê de hat ragihandin ku Google ji ber tercîhkirina xizmetên xwe yên li ser motora xwe ya lêgerînê (Google Search) bi 460 milyon euroyan û ji ber astengkirina pêşdebirên sepanan ên li ser Google Playê ku bikarhêneran ber bi kanalên kirînê yên alternatîf ve araste bikin, bi 430 milyon euroyan hatiye cezayîkirin. Bi giştî 890 milyon euro ceza ji Google re hat birîn.
60 roj muhlet hat dayîn
Divê Google di nav 60 rojan de biryarên Komîsyonê bi cih bîne. Hat hişyarkirin ku heke vê yekê neke, rîska wê heye ku rojane heta ji sedî 5ê dahata xwe ya salane ya cîhanî ceza bê girtin. Herwiha mafê Google yê îtîrazê jî heye ku serî li dadgehê bide.
