YE, 72,5 milyon euro alîkarî dide Iraq û Kurdistanê

PeyamaKurd - Wezîrê Darayî yê Iraqê Fûad Hûsên piştî civîna ligel Berpirsê Hevkarî û Pêşvebirinê yê Yekîtiya Ewropa (YE) li Asya û Rojhilata Navîn Pierre Amilhat ragihand ku ew li ser alîkariya 72,5 milyon euro alîkarî bo Iraq û Kurdistanê rêkeftine.

Hûsen diyar kir, wan li ser pêşkeşkirina xizmetguzariyan, zindîkirina aboriyê, paqijkirina mayinan û çaksaziyên kerta enerjiyê rêkeftineke stratejîk îmze kiriye û got, nirxa wê rêkeftinê 72,5 milyon euro ye û kerta petrolê jî eleqedar dike.

Hûsên da zanîn ku dê şanda YEyê serdana Hewlêr, Kerkûk, Dihok û Silêmaniyê û çend herêmên din bike û ji bo ji nû ve avadankirinê lêkolînan bike.

Hat ragihandin ku 10 milyon euro bo vegera koçberan û paqijkirina mînan li Enbar, Kerkûk, Selahadin û Diyalayê hatiye terxankirin, 48,5 milyon euron ji bo avadankirina bajarên Enbar, Basra, Dihok, Hewlêr, Meysan, Mûsil, Selahadîn, Suleymaniye û Zûkarê hatiye terxankirin.

Herwiha 14 milyon euro ji wê alîkariyê jî ji bo başkirina kerta enerjiyê ya hikûmeta Iraqê hatiye terxankirin.