Serokwezîr Mesrûr Barzanî: Em pabendî parastina azadiyên çapemeniyê ne
Serokê Hikûmeta Herêma Kurdistanê, Mesrûr Barzanî, bi boneya "Roja Rojnamevaniya Kurdî" û salvegera derketina yekem hejmara rojnameya Kurdistanê li ser destê Mîr Miqdad Midhet Bedirxan, pîrozbahî li hemû rojnamevan û xebatkarên ragihandinê yên Kurdistanê kir. Ev roj herwiha hevdem e ligel salvegera damezrandina Sendîkaya Rojnamevanên Kurdistanê.
RûpelNews - Serokê Hikûmetê di peyama xwe de tekez kir ku Hikûmeta Herêma Kurdistanê bi berdewamî pabend e bi berevanîkirina ji azadiya karê ragihandin û rojnamevaniyê û pêşkêşkirina hemû asankariyên pêwîst ji bo kadroyên ragihandinê da ku erkên xwe encam bidin. Barzanî destnîşan kir ku jîngeha demokratîk pêdivî bi çapemeniyeke azad û dadperwer heye.
Banga ji bo pîşeyîbûn û berpirsiyariyê
Di heman çarçoveyê de, Barzanî bang li malbata rojnamevaniyê kir ku pabendî pîvanên herî bilind ên pîşeyî û berpirsiyariya civakî bin. Herwiha daxwaz kir ku qanûnên berkar, etîka pîşeyî û pîvanên navdewletî yên rojnamevaniyê li ber çav bigirin.
Wî bal kişand ser rola çalak a ragihandinê di hişyarkirina civakê, berevanîkirina li destkeftiyên neteweyî, parastina çanda pêkvejiyana aştiyane û statuya destûrî ya Herêma Kurdistanê.
Mesrûr Barzanî peyama xwe bi hêviya serkeftin û pêşveçûna zêdetir ji bo hemû rojnamevanên Herêmê bi dawî kir û tekez kir ku çapemenî dê her dem wekî stûneke bingehîn di avakirina civakeke ronakbîr û demokratîk de bimîne.
