Sekreterê NATOyê, serdana Tirkiyeyê dike!

PeyamaKurd- Li gorî agahiyên hatin ragihandin, Sekreterê Giştî yê NATOyê Jens Stoltenberg ragihand ku ew ê di demeke nêz de biçe Enqereyê û bi Serokomarê Tirkiyeyê Recep Tayîp Erdogan re li ser endamtiya Swêdê ya NATOyê biaxive.

Jens Stoltenberg, beriya Civîna Wezîrên Karên Derve ya NATOyê ku wê li paytexta Norwêcê Osloyê bê lidarxistin, daxuyanî da çapemeniyê û got ku

“Ez di serê vê hefteyê de bi Serokomarê Tirkiyeyê Erdogan re axivîm. Ez her tim girîngiya pêşketina li ser endambûna Swêdê radigihînim. Ez ê di demeke nêzîk de jî biçim Enqereyê û li ser çawaniya beşdarbûna Swêdê ya muhtemel biaxivim.

Divê em ji bîr nekin ku hemû hevalbendan û Tirkiye û Swêdê vexwendibûn ku bibe endamek tam û ev yek di civîna bilind a Madridê de pêk hat. Heta niha ev pêvajoyek pejirandinê pir bi lez bû ji ber ku Finlandiya û Swêd di gulanê de serlêdan kirin. 

Finlandiya jixwe bûye endam û ez bawer im Swêd jî dê bibe endam. Em dixebitin ku ev yek di zûtirîn demê de pêk were. Peyama min ev e ku endametiya Swêdê ji bo Swêdê, ji bo welatên Skandinavyayê, ji bo dewletên Baltik û ji bo NATOyê jî baş e. Ev yek dê NATOyê bihêztir bike û ji bo Tirkiyeyê û hemû hevalbendan jî baş be. Ez ê di demeke nêzî de biçim Enqereyê, lê dîrok hîn ne diyar e.”