Rojava | 'Em hêviya xwe bi hêzên derve girê nadin, ya girîng berxwedan e'

PeyamaKurd - Berpirsê Komîteya Peywendiyên Doplomasî ya Tevgera Civaka Demokratîk (TEV-DEM) Aldar Xelîl li ser daxuyaniya Serokê Amerîkayê Donald Trump a vekişandina hêzên Amerîkayê ji Sûriyê got, ew ti caran hêviyên xwe bi hêzên derve ve girê nadin.

Aldar Xelîl ji medyaya Rojavayê Kurdistanê re ragihand, wan ti carî hêviyên xwe “li Bakur û Rojhilatê Sûriyê” bi hêzên derve girê nedaye û wiha axivî:

"Em di pêvajoyeke gelek hesas re derbas dibin. Tê xwestin ku em vê pêvajoyê baş binirxînin. Tirkiyê hemû rêbazên siyasî û doplomasî bi kar anîn da ku şoreşa Bakur û Rojhilatê Sûriyeyê têk bibe."

Xelîl diyar kir ku hîn çawaniya vekişandina Amerîkayê diyar nebûye û dubare got: “Hêviyên me ne girêdayî hêzên derve ne, heger bimînin dibe ku sûd ji mayîna wan were girtin, heger biçin jî ya girîng berxwedana gelê me ye.”