NY: Şerê li Îranê dê 30 milyon mirovan bixe xizaniyê
Neteweyên Yekbûyî (NY) hişyarî da ku kêmasiya sotemenî û zibilî ya ji ber şerê li Îranê çêbûye, dikare bi milyonan mirovan bixe xizaniyê.
RûpelNews - Li gorî nirxandina NYê, şerê li Îranê dê zêdetirî 30 milyon mirovan li seranserê cîhanê bixe nav xizaniyê.
Serokê Bernameya Pêşkeftinê ya Neteweyên Yekbûyî (UNDP) Alexander De Croo, roja pêncşemê di daxuyaniyekê de diyar kir ku sedema sereke ya vê yekê kêmasiya sotemenî û zibilî ye. De Croo, destnîşan kir ku girtina Tengava Hurmuzê ji bo keştiyên barhilgir wekî beşek ji pevçûnê jixwe berhema çandiniyê kêm kiriye û dê bi awayekî neyînî bandorê li dahatên berhemên çandiniyê bike.
"Zêde tiştek nîne ku were kirin"
"Bêewlehiya xwarinê dê di nav çend mehan de bigihîje lûtkeyê. Derbarê vê yekê de zêde tiştek nîne ku were kirin," De Croo got, û tekez kir ku dê encamên wê werin hîskirin heta eger şer yekser bi dawî bibe jî, û dê mirovan careke din bi xizaniyê bihêle.
Sêyeka zibila cîhanê di Tengava Hurmuzê re derbas dibe
Piraniya zibila cîhanê li Rojhilata Navîn tê hilberandin. Sêyek ji dabînkirina cîhanî bi rêya Tengava Hurmuzê tê veguhestin, ku Îran û DYA ji bo kontrola wê di nav pêşbaziyê de ne.
Di destpêka vê mehê de, Banka Cîhanê, Fona Pereyan a Navneteweyî (IMF) û Bernameya Xwarinê ya Cîhanê ya Neteweyên Yekbûyî (WFP) jî hişyarî dabûn ku şer dê bihayên xwarinê bilind bike. De Croo lê zêde kir ku krîzê di navbera ji sedî 0.5 û 0.8ê berhema aborî ya cîhanî de tune kiriye.
"Em dê neçar bimînin bibêjin ku em nikarin alîkariyê bikin"
De Croo, ku şîrove kir ku ji ber van geşedanan dê alîkariya mirovî neçar bimîne sînordar bibe, her wiha bal kişand ser pêdiviya zêde ya li Sûdan, Xeze û Ukraynayê. De Croo got, "Em dê neçar bimînin ji hin kesan re bibêjin ku em bi rastî poşman in, lê em nikarin alîkariya wan bikin." (Jêder: DW)
