Nêçîrvan Barzanî: Herêma Kurdistanê welatê pêkvejiyanê ye
Serokê Herêma Kurdistanê Nêçîrvan Barzanî, Cejna Serê Salê ya kurdên êzidî pîroz kir û got, “Ez hêvî dikim ev sersal bibe destpêka saleke tijî serkeftin û aramî.”
RûpelNews - Serokê Herêma Kurdistanê Nêçîrvan Barzanî bi helkefta Cejna Serê Salê ya kurdên êzidî (Çarşema Sor) peyameke pîrozbahiyê belav kir.
Nêçîrvan Barzanî, di peyama xwe de wiha got:
“Cejna Sersala êzîdiyan li hemû xuşk û bira û hevwelatiyên me yên êzîdî yên li Kurdistan, Îraq û li her derê cîhanê bin, bi germî û ji dil pîroz dikim.
Ez hêviya cejneke aram û tijî xweşî ji bo hemûyan dixwazim. Hêvîdar im ev sersal bibe destpêka saleke tijî serkeftin û aramî.
Di vê helkeftê de, careke din xuşk û birayên xwe yên êzîdî piştrast dikim ku wekî her dem Herêma Kurdistanê dê welatê pêkvejiyan, efû û hevdûqebûlkirinê ji bo hemû pêkhateyan bimîne.
Her wiha em dê her wekî piştgir û parastvanê maf û daxwazên wan ên rewa bimînin.
Sersala hemûyan pîroz be, her sal bi xêr û xweşî.”
