Mesrûr Barzanî: Partî û Serok Barzanî hêviya xelkê Kurdistanê ne

RûpelNews - Cîgirê Serokê Partiya Demokrata Kurdistanê Mesrûr Barzanî, bi boneya 16ê Tebaxê, 80 saliya damezrandina PDKê û roja ji dayikbûna Serok Mesûd Barzanî peyamek weşand.

Mesrûr Barzanî di peyama xwe de pîrozbahiyên xwe pêşkêşî Serok Mesûd Barzanî, malbatên şehîd û Enfalkiriyan û Pêşmergeyên Kurdistanê kir.

“Yek ji rojên dîrokî yên gelê me ye”

Barzanî, damezrandina PDKê ji aliyê Mistefa Barzaniyê Nemir ve wek yek ji bîranînên dîrokî yên gelê Kurdistanê binav kir.

Wî got:

“Bîranîna damezrandina kevnartirîn, mezintirîn û bihêztirîn partiya Kurdistanê li ser destê Rêberê dîrokî û bavê rihî yê gelê me Mistefa Barzaniyê Nemir yek ji rojên geş û bîranînên dîrokî yên gelê me ye.”

“PDK şopdarê rêbaza Barzaniyê Nemir e”

Mesrûr Barzanî di peyama xwe de destnîşan kir ku PDK di bin rêberiya Serok Mesûd Barzanî de rêbaza Mistefa Barzanî didomîne.

Wî diyar kir ku partî di vê demê de “lehengî û destkeftiyên mezin û dîrokî” tomar kirine û ev destkeftî ji bo Kurdistaniyan cihê serbilindiyê ne.

“Partî û Serok Barzanî cihê baweriya xelkê Kurdistanê ne”

Mesrûr Barzanî di berdewamiya peyama xwe de got:

“Partî û Serok Barzanî, hêvî, omîd û cihê baweriya xelkê Kurdistanê û gerentiya parastin û pêşdebirina ewlekarî û aramiyê, pêgeha destûrî ya Herêma Kurdistanê û çanda bihevrebûna aştiyane di navbera pêkhateyên Kurdistanê de ne.”

Barzanî herwiha PDK û Serok Barzanî wek garantiyê ji bo nûjenkirin, avakirin û pêşxistina Kurdistanê binav kir.

Bîranîna Mistefa Barzanî, Îdrîs Barzanî û şehîdan

Cîgirê Serokê PDKê di dawiya peyama xwe de Mistefa Barzaniyê Nemir, Îdrîs Barzanî, serkirde, xebatkar û şehîdên Kurdistanê bi bîr anî.

Mesrûr Barzanî peyama xwe bi gotina, “Hertim şikodar û pîroz be bîranîna 16ê Tebaxê” bi dawî kir.