Li ser cilên Rojîn Kabaîş nimûneya DNAyê nehatiye girtin
Hat ragihandin ku ji cilên Rojîn Kabaîş a xwendekara zanîngehê ya ku cinazeya wê 18 roj piştî windabûna wê li Wanê hatibû dîtin, ti nimûneyên DNAyê nehatine girtin. Parêzerê malbatê daxwaz kir ku li ser cilên wê analîza DNAyê were kirin.
RûpelNews - Di lêpirsîna li ser mirina Rojîn Kabaîş a xwendekara Zanîngeha Van Yuzuncu Yilê pêşhateyeke nû çêbû.
Derket holê ku ji cilên Kabaîş a ku di 27ê Îlona 2024an de winda bûbû û cesedê wê di 15ê Cotmeha 2024an de li peravên Gola Wanê hatibû dîtin, ti nimûneyên DNAyê nehatine girtin.
Piştî serlêdana malbatê ya bi rêya parêzerên wan ên nû daxwaz hat kirin ku şopên DNAyê yên muhtemel ên li ser cilan bên muayenekirin. Hat ragihandin ku dê ev muayene bi qasî du salan paşê were kirin.
Malbata Kabaîş her wiha daxwaz kir ku ji bo ronîkirina bûyerê testeke diatomê were kirin, ji ber ku ev yek dikare agahiyên girîng peyda bike ka gelo kes ji ber xeniqînê ketiye avê an piştî mirina xwe hatiye avêtin nav avê.
Mirina Rojîn Kabaîş
Rojîn Kabaîş di 27ê Îlona 2024an de piştî ku ji kampusa Zanîngeha Van Yuzuncu Yil derket winda bû, lêgerîn ji bo wê hat destpêkirin. Piştî operasyonên lêgerînê, di 15ê Cotmeha 2024an de cinazeya Kabaîş li peravên Gola Wanê li navçeya Tuşbayê hat dîtin. Malbata wê îddia dike ku keça wan xwe nekuştiye ew hatiye kuştin û li ser vê berfirehkirina lêpirsînê dikin.
