Li Pentagonê alarma 'xeterê': Karantîna û valakirinê dest pê kir
Piştî 'bûyereke madeyên xeternak' li Pentagonê, ku navenda Wezareta Parastinê ya DYAyê ye, çend qat û korîdorên avahiyê ketin karantînayê, di heman demê de li hin beşan dest bi prosedurên valakirinê hatiye kirin.
RûpelNews - Li gorî agahiyên ku ji aliyê sê çavkaniyên nêzîkî mijarê û berpirsên servîsa agirkujiyê ya herêmî ve ji çapemeniya amerîkî re hatine dayîn, ji ber bûyera ku di nav Pentagona de hatiye tespîtkirin, tedbîrên ewlehiyê yên berfireh tên girtin.
Çavkaniyeke sêyemîn a ku ji CNNa amerîkî re axivî ragihand ku polîsên di nav avahiyê de bi maskeyên gazê û cilên parastinê yên kîmyewî yên tevahî laş li ser kar bûn. Hêj derbarê çavkaniya bûyerê an jî cewhera madeya ku hatiye tespîtkirin de ti daxuyaniyeke fermî nehatiye dayîn.
Berdevkê Pentagonê Sean Parnell roja Pêncşemê di daxuyaniyekê de piştrast kir ku sîstemên avahiyê pirsgirêkek di kalîteya hewayê de tespît kirine.
Parnell got, "Sîstemên di nav Pentagonê de pirsgirêkek di kalîteya hewayê de tespît kirine ku pêwîstî bi girtina tedbîrên pêşîlêgir heye heta ku giraniya rewşê were diyarkirin."
Di daxuyaniya xwe de, wî lê zêde kir, "Wezaret protokolên parastinê yên standard bi cih tîne ku tê de ji personelên li herêmên bandorbûyî tê xwestin ku li cihên xwe yên niha bimînin. Tîmên bersivdanê li cihê bûyerê ne û amade ne ku piştgiriyê bidin personelên di nav avahiyê de."
Tîma pispor a bersivdayînê
Bûyer ji aliyê tîma bersivdayînê ya madeyên xeternak a Ajansa Parastina Hêzê ya Pentagonê (PFPA) ve, bi piştgiriya Rêvebiriya Agirkujiyê ya Wîlayeta Arlingtonê tê birêvebirin.
Berdevka Rêvebiriya Agirkujiyê ya Arlingtonê Kaptan Jamie Jill, piştrast kir ku tîm li cihê bûyerê berdewamiya karê xwe dikin. Di daxuyaniyekê de ku ji aliyê Ajansa Agirkujiyê û Feryarên Lezgîn a Arlingtonê (Arlington Fire & EMS) ve bi rêya medyaya civakî hat weşandin, her wiha hat ragihandin ku Tîma Madeyên Xeternak a Ajansa Agirkujiyê ya Wîlayeta Arlingtonê ji ber "bûyera madeyên xeternak" a li Pentagonê li ser kar e.
Li gorî çavkaniyên ku ji çapemeniya Amerîkî re axivîne, ji ber sedemên ewlehiyê, qatên duyemîn, sêyemîn, çaremîn û pêncemîn ên di navbera korîdorên çaremîn û heftemîn ên kompleksa Pentagonê de bi temamî hatine girtin.
