Kuştina dengbêjên li Elezîzê kete rojeva Parlamentoya Tirkiyeyê
Kuştina dengbêj Hayriye Uyku û hevjînê wê Ağa Uyku ku piştî şewitandina mala wan li navçeya Karakoçan a Elezîzê termên wan hatin dîtin kete rojeva Parlamentoyê. Parlamentera DEM Partiyê ya Mûşê Sumeyye Boz, ji bo ku Wezîrê Karên Hundirîn Mustafa Çiftçi bersivê bide, pirseke nivîskî pêşkêşî parlamentoyê kir.
RûpelNews - Termên bêcan ên Hayriye Uyku û hevjînê wê Aga Uyku, piştî şewateke ku di 8ê Îlona 2026an de li mezreya Urunlu ya gundê Koçyigitler a Karakoçanê derketibû, di malekê de hatin dîtin. Herçend di nirxandinên destpêkê de dihat texmînkirin ku cot ji ber şewatê jiyana xwe ji dest dane, piştre derket holê ku ew bi guleyan hatine kuştin û piştre mala wan hatiye şewitandin.
Di çarçoveya lêpirsîna derbarê bûyerê de çar kes hatin desteserkirin. Hat ragihandin ku karûbarên gumanbaran ên li cem cendirmeyan û lêpirsîn berdewam dikin.
Kurê cotê, Duzgun Uyku, xwest ku kujerên vê bûyerê di zûtirîn dem de bên dîtin. Uyku diyar kir ku malbat dixwaze baweriya xwe bi saziyên giştî bîne û daxwaz kir ku lêpirsîn bi awayekî zelal û temamî were encamdan.
Li Parlamentoyê gelek pirs hatin kirin
Parlamentera DEM Partiyê ya Mûşê Sumeyye Boz, ji bo ronîkirina hemû aliyên bûyerê, pirseke nivîskî pêşkêşî Wezîrê Karên Hundirîn Mustafa Çiftçi kir.
Boz di pêşniyara xwe de pirsî ka lêpirsîn di kîjan qonaxê de ye û têkildarî bûyerê çend kes hatine desteserkirin. Her wiha wê derbarê cureyê çekê, hejmara guleyên hatine teqandin û delîlên li cihê bûyerê hatine komkirin de agahî xwestin. Boz her wiha pirsî ka şewat ji bo veşartina cinayetê hatiye derxistin an na, û mijarên wekî lêkolîna şopên li cihê bûyerê, tevlêkirina tomarên bircên telefonê (baz) di lêpirsînê de û hewldanên ji bo dîtina zêrên windabûyî anî ziman.
Pirsgirêka ewlehiya malbatê jî hat rojevê
Di pirsa parlamentoyê de herwiha hat pirsîn ka malbata Uyku bi awayekî birêkûpêk derbarê pêvajoya lêpirsînê de tê agahdarkirin an na, û ka ji bo misogerkirina ewlehiya endamên malbatê ti tedbîr hatine girtin an na.
Boz, bi wê gotinê ku lêpirsîna bi bandor û şefaf a tawanên giran ên li deverên gundewarî pêk hatine berpirsiyariyeke bingehîn a rayedarên giştî ye, xwest ku bûyera mirina Hayriye û Aga Uyku bi temamî were ronîkirin.
Tê payîn ku lêpirsîn hûrgiliyên derbarê awayê pêkanîna kuştinê, nasnameya sûcdaran û sedema danîna agir piştî bûyerê de ronî bike.
