Konsûlê Fransa: Em dixwazin asta veberhênanê li Kurdistanê zêde bibe

PeyamaKurd - Konsulê Giştî yê Fransa yê Hewlêrê Yann Braem got, li ber ronahiya pêwendiyên bihêz ên di navbera Fransa û Herêma Kurdistanê de, em li bendê ne ku asta veberhênanê li Herêma Kurdistanê zêde bibe.

Yann Braem ji K24ê re gotiye, “Pêwendiyên di navbera Fransa û Herêma Kurdistanê de gelek bihêz in û em di wê baweriyê de ne ku jîngeheke aborî ya gelek guncav a Herêma Kurdistanê di hemû beşên cuda de heye, di nav wan de jî sektora çandinî û sektorên din.”

Braem diyar kir, çend kompanî û kargehên Fransî li Herêma Kurdistanê kar dikin. Bi berçavgirtina pêwendiyên bihêz ên ku hene, em bi hêvî ne ku asta veberhênanê zêdetir bibe.

Konsûlê Fransayê da zanîn: “Ji bo vê yekê jî aliyên pêwendîdar ên Fransa û Herêma Kurdistanê li ser lidarxistina konferanseke hevbeş li hev kirine. Ev jî dibe sedem ku Fransa bi şiyanên xwe yên cuda, zêdetir piştgiriya Herêma Kurdistanê bike.”