Kiliçdaroglu û Ozel li Enqereyê du çalakiyên cuda yên cejnê li dar dixin
Digel ku nakokiyên navxweyî di nav Partiya Gel a Komarî (CHP) de berdewam dikin, îro dê li Enqereyê du bernameyên cuda yên cejnê bên lidarxistin. Kemal Kiliçdaroglu, yê ku bi biryara dadgehê wek serokê partiyê hate vegerandin, dê li navenda CHPê cejnê bi welatiyan re pîroz bike. Ozgur Ozel, Serokê Koma CHPê yê ku ji posta xwe hatibû dûrxistin, dê li çalakiyeke ku li ber Navenda Seroaktiya CHPê ya Enqerê were lidarxistin, xîtabî welatiyan bike.
RûpelNews - Kemal Kiliçdaroglu dê beşdarî bernameya pîrozbahiya cejnê ya ku dê saet di 14.00an de li Navenda CHPê were lidarxistin, bibe. Hat ragihandin ku Kiliçdaroglu dê di dema bernameyê de xîtabî welatiyan bike û derbarê pêvajoya 'paqijkirinê' ya ku berê behs kiribû de daxuyaniyan bide.
Beriya çalakiyê, bi rêya medyaya civakî bang li xelkê hatin kirin ku ji parêzgehên cuda biçin Enqerê, û her wiha hatibû destnîşankirin ku Kiliçdaroglu dê axaftina xwe li ber deriyê avahiya Navenda Giştî pêşkêş bike. Postereke mezin a Kiliçdaroglu ku dirûşma 'niha dema paqijkirinê ye' li ser e, li ser avahiya Navenda Giştî hatiye daliqandin.
Ozgur Ozel dê li ber Serokatiya CHPê ya Enqereyê biaxive
Di heman demê de, Serokê Koma CHPê Ozgur Ozel dê beşdarî pîrozbahiyên cejnê yên ku dê li ber derê avahiya CHPê ya Enqere ya li Guvenparkê bên lidarxistin, bibe. Tê plankirin ku Ozel li ser otobusekê xîtabî gel bike.
Rêxistina CHPê bang li welatiyan kir û wiha ragihand "Em li benda tevlêbûna hemû gelê xwe ne da ku ruhê hevgirtina cejnê xurt bikin û yekîtiya û têkoşîna xwe bihêz bikin."
Îdiayên derbarê betalkirina mîtîngê de
Berî pîrozbahiyên cejnê, îdiayên wisa derketin holê ku serokatiya Kiliçdaroglu daxwazeke fermî ji bo betalkirina çalakiya ku Ozgur Ozel plan dikir li Enqerê li dar bixe, pêşkêş kiriye.
Di daxuyaniyeke ku ji aliyê Kiliçdaroglu ve derbarê van îdiayan de hat weşandin, hat destnîşankirin ku serokatiya CHPê tu serlêdanek pêşkêşî Parêzgeriya Enqerê nekiriye ji bo qedexekirina çalakiya ku dê li Guvenparkê were lidarxistin.
