Belema koçberan noqav bû: 11 kes mirin
Li bajarê Mugla yê Tirkiyeyê belemeke koçberan binav bû, 11 kesan canê xwe ji dest da û 21 kes bi saxî hatin rizgarkirin.
RûpelNews - Hate ragihandin ku piştî noqbûna belema lastîkî ya ku koçberan vediguhast li peravên navçeya Bodrum a ser bi Muglu ya Tirkiyeyê ve, 11 kesan jiyana xwe ji dest dan û 21 kes hatin rizgarkirin. Tê ragihandin ku operasyonên lêgerîn û rizgarkirinê li herêmê berdewam dikin.
Bûyer derdora saet 06.00an li peravên taxa Yalıkavak a Bodrumê qewimî. Piştî binavbûna belema lastîkî ya ku koçberên neyasayî vediguhast, hejmareke mezin ji tîmên rizgarkirinê ber bi herêmê ve hatin şandin.
Lêgerîn û rizgarkirina bi piştgiriya helîkopterê berdewam e
Ji bilî tîmên ji Fermandariya rizgarkirinê, helîkoptereke ku ji Îzmîrê hat şandin jî tevlî operasyonan bû. Hat ragihandin ku di operasyonên ku ji aliyê tîman ve hatin meşandin de, termên 11 kesan hatine derxistin û 21 kesên din jî bi saxî hatine rizgarkirin.
Hejmara koçberan nayê zanîn
Desthilatdaran diyar kirin ku ew li gorî îfadeyên koçberên rizgarkirî hejmara giştî ya kesên li ser keştiyê diyar dikin. Hat ragihandin ku operasyonên lêgerîn û rizgarkirinê li herêmê hem ji hewayê û hem jî ji deryayê berdewam dikin.
