Joe Biden pistî biryara vekisîna ji namzetiyê yekem daxuyanî da

PeyamaKurd – Serokê Amerîkayê Joe Biden piştî biryara xwe ya vekişîna ji namzediyê li Qesra Spî xîtabî gel kir.

Biden got, “Gel li DYAyê birêve dibe, ne padîşah. Demokrasî ji her sernavî girîngtir e. Dem hatiye ku em meşaleyê bigihînin nifşên din. Vekişîn biryara herî baş bû ji bo yekkirina milet.”

Biden piştî ku ji pêşbirka serokatiyê vekişiya, yekem car xîtabî gel kir û diyar kir ku çima wî Cîgira Serok Kamala Harris li şûna xwe pêşniyar kir: "Min biryar da ku rêya herî baş ew e ku ez şefafiyê bidim nifşek nû. Ev rêya herî baş e ji bo yekgirtina miletê me."

Roja yekşemî 21ê Tîrmehê, rêberê Amerîkayê ji bo cara yekê li Koşka Spî derket pêşberî kamerayan li ser vekişîna xwe ji pêşbirka serokomariyê ku di 5ê Mijdarê de birêve diçe û sedemên vê biryara xwe eşkere kir.

Biden balkişand li ser wê yekê ku ew ji welatê xwe hez dike û xizmeta welatê xwe dike û ew bi serokatiya xwe gelek şanaz e û got ku ew di heyamekê de ne ku pêwîstî bi parastina demokrasiyê heye û biryara ku wî daye divê di vê çarçoveyê de bê nirxandin.

"Ev rêya herî baş e ku miletê me bike yek."

Biden destnîşan kir ku biryara vekişîna ji pêşbirkê ji bo serketina di hilbijartinan de li hember namzedê Komarî Donald Trump hatiye girtin û wiha dewam kir:

"Ez bawer dikim ku tiştê ku min wek serok kir, serokatiya min li cîhanê, dîtina min a ji bo pêşeroja Amerîkayê, wê ji bo serdema duyemîn têrê bike. Lê tu tişt nikare rê li ber rizgariya demokrasiya me bigire, heta daxwazên me yên şexsî jî. Ji ber vê yekê, min biryar da ku rêya herî baş ew e ku ez alê bidim nifşê nû. Ev rêya herî baş e ku miletê me bike yek.