Ji sedî 73ê hevrîşima li Tirkiyeyê ji Pasûra Amedê tê hilberandin
Navçeya Pasûra Amedê ku navendeke sereke ya hilberîna hevrîşimê ye bi hilberîneke salane ya bi deh hezaran tonan, ji sedî 73ê pêdiviyên Tirkiyeyê yên ji bo hevrîşimê pêk tîne. Fabrîqaya Pasûrî Îpek ku li navçeyê kar dike û yekane kargeha hevgirtî ya kurmikên hevrîşimê ya Tirkiye û Ewropayê ye ji bo sedan malbatan jî dibe deriyê debara jiyanê.
RûpelNews - Navçeya Pasûrê ya Amedê ne tenê bi bedewiya xwe ya xwezayî û dîroka xwe herwiha bi rêjeyeke zêde ya hilberîna hevrîşimê ya li tevahiya Tirkiyeyê jî balê dikişîne.
Pasûr: Navenda hilberîna hevrîşimê
Li gorî ragihandina rojnamevan Emrah Çaçan bo RûpelNews, ji hilberîna hevrîşima 117 hezar kîloyî ya sala par li Tirkiyeyê bi qasî 90 hezar kîloyî li Pasûrê hat hilberandin. Ji ber vê yekê, ev yek tesîs bi serê xwe nêzîkî ji sedî 73ê pêdiviyên Tirkiyeyê yên ji hevrîşimê pêk tîne. Pasûrî Îpek ku tê da 35 kesan kar dike û bi kapasîteya xwe ya hilberînê derdikeve pêş, wek yek ji navendên herî girîng ên hilberîna navxweyî tê dîtin ku armanca wê kêmkirina kirîna hevrîşima ji derveyî welêt e.
Şal, şalik u gelek cilên din ji hevrîşimê tên çêkirin
Hilberîna ewil li navçeyê bi belavkirina tovên hevrîşimê dest pê dike. Tovikên ku li ser hezaran darên tûyê tên xwedîkirin, bi xebata dijwar a zêdetirî hezar cotkaran vediguherin pûpûkan. Pûpûkên teze yên ku tên berhevkirin, li fabrîkayê li ser kar tên kirin da ku rîsê hevrîşimê yê xwezayî jê were çêkirin. Paşê ev, bi xebata dijwar û fedakariya hilberînerên jinên Pasûrê vediguherin şal, şalek û cûrbecûr berhemên tekstîlê.
Tesîs ku li ser prensîba hilberîna bi temamî weke xwemalî dixebite, her wiha bi avahiya xwe ya ku piştgiriyê dide kooperatîfên jinan û bi modela xwe ya hilberînê ya ekolojîk û domdar jî derdikeve pêş.
Bi sedan malbatên kurd debara mala xwe di ser hilberîna hevrîşimê re pêk tînin. Ev kar ku kedkariya jinan, hilberîna herêmî û pêşketina gundewarî bi hev re tîne cem hev, Pasûrê kiriye yek ji navendên herî girîng ên Tirkiyeyê ji bo hilberîna hevrîşimê.
