Îtalya: Em piştgiriya Herêma Kurdistanê dikin
Serokê Herêma Kurdistanê Nêçîrvan Barzanî û Alîkarê Serokwezîr û Wezîrê Karên Derve yê Îtalyayê, Antonio Tajani, di pêwendiyeke telefonî de derbarê pêşketinên dawî yên herêmê û êrîşa li baregeha leşkerî ya Îtalyayê li Herêma Kurdistanê axivîn.
RûpelNews - Serokê Herêma Kurdistanê Nêçîrvan Barzanî û Alîkarê Serokwezîr û Wezîrê Karên Derve yê Îtalyayê, Antonio Tajani, di pêwendiyeke telefonî de derbarê pêşketinên dawî yên herêmê û êrîşa li baregeha leşkerî ya Îtalyayê li Herêma Kurdistanê axivîn.
Serokatiya Herêma Kurdistanê di daxuyaniyekê de ragihand ku di pêwendiya telefonî de pêşketinên dawî yên li herêmê û bandorên şer li ser ewlehî û aramiya herêmê û cîhanê hatine gotûbêjkirin.
Li gorî daxuyaniyê, Serokê Herêma Kurdistanê Nêçîrvan Barzanî bi tundî êrîşa şeva borî ya li ser baregeha leşkerî ya Îtalyayê li Herêma Kurdistanê şermezar kir.
“Divê Hikûmeta Îraqê berpirsiyariya xwe pêk bîne”
Barzanî diyar kir ku pêwîst e Hikûmeta Îraqê berpirsiyariya xwe ya parastina nûnertiyên dîplomatîk û hêzên hevpeymanan bi cih bîne.
Wî got:
“Divê Hikûmeta Îraqê berpirsiyariya xwe pêk bîne û rê nede ku komên derveyî qanûnê careke din asayîş û berjewendiyên welêt bixin metirsiyê.”
Peyama piştgiriyê ya Îtalyayê
Serokatiya Herêma Kurdistanê her wiha ragihand ku Wezîrê Karên Derve yê Îtalyayê Antonio Tajani jî êrîşa li ser baregeha leşkerî ya welatê wî bi tundî şermezar kiriye.
Tajani tekez kir ku Îtalya dê ji bo rûbirûbûna astengiyan û êrîşên terorîstî, piştgirî û hevkariya xwe bi Îraq û Herêma Kurdistanê re bidomîne.
Wî her wiha got ku welatê wî dê ji bo parastina aştî û aramiya herêmê hevkariya xwe bi hevpeymanan re pêş bixe.
Spasiya Barzanî ji Îtalyayê
Di dawiya pêwendiya telefonî de, Nêçîrvan Barzanî ji ber piştgirî û hevkariya berdewam a Îtalyayê bi Herêma Kurdistanê re spasiya wî welatî kir.
Nêçîrvan Barzanî her wiha rola hêzên Îtalyayê ya di çarçoveya Hevpeymaniya Navneteweyî de bilind nirxand.
