Herêma Kurdistanê rastî êrîşên dronan hat: 8 Pêşmerge birîndar bûn
Herêma Kurdistanê di 24 saetên dawî de bûye armanca pênc êrîşên dronan. Di êrîşan de 8 Pêşmergeyên girêdayî partiyeke siyasî ya li Rojhilatê Kurdistanê birîndar bûn û hat ragihandin ku rewşa 4 ji wan giran e.
RûpelNews - Êrîşên dron û mûşekan li ser Herêma Kurdistanê berdewam dikin. Li gorî raporeke Rûdawê, di nava 24 saetên borî de di 5 êrîşên dronê de 8 Pêşmergeyên Rojhilatî birîndar bûn.
Êrîşa herî giran derdora saet 02.00ê serê sibêya 19ê Tîrmehê li kampa Partiya Azadiya Kurdistanê (PAK) ya li herêma Mêrgesorê pêk hat. Berpirsê PAKê Edîb Xalidyan, ragihand ku di êrîşê de 8 Pêşmerge birîndar bûne, ku rewşa 4 ji wan krîtîk e.
Di saet 00.57 a heman şevê de, li ser Hewlêrê du êrîşên bi dronan hatin kirin, di heman demê de li ser sînorên Îdareya Serbixwe ya Soranê du teqînên bihêz hatin bihîstin. Rayedaran heta niha ne piştrast kirine ka teqîn ji ber dronan bûn an ji ber êrîşên mûşekî bûn.
Ji destpêka mehê ve 45 êrîş
Di navbera 1ê Tîrmehê û nîvroya 19ê Tîrmehê de, Herêma Kurdistanê bi giştî rastî 45 êrîşên dron û mûşekan hat.
Ji van êrîşan, 32 li nav sînorên Amediyê pêk hatin, dema ku devera derdora Silêmaniyê bû armanca 10 êrîşên moşekan û sê êrîşên dronên.
Meha borî, 13 êrîşên bi dronan û du êrîşên mûşekî li dijî herêmê hatin pêkanîn.
Encamên şer giran dibe
Ji dema ku pevçûnên di navbera DYA, Îsraîl û Îranê de di 28ê Sibatê de dest pê kirin, Herêma Kurdistanê bûye armanca 918 êrîşên bi dronan û mûşekan.
Heta niha, di êrîşan de 30 kesan jiyana xwe ji dest daye û 148 kes jî birîndar bûne.
Ji tevahiya êrîşan, 627 li Hewlêrê, 258 li Silêmaniyê, 31 li Dihokê û du jî li derdora Kerkûkê pêk hatine.
Di nav qurbaniyan de Pêşmerge, endamên Asayîşê, xelkên sivîl û leşkerekî fransî yê ku li Hewlêrê bi cih bûbû hebûn, di heman demê de di nav birîndaran de jî hejmareke mezin ji Pêşmerge, sivîl, endamên Asayîşê û 5 leşkerên fransî hebûn.
