Ewlehiya Balafirgeha Qamişloyê ket bin kontrola hêzên Sûriyê
Wezareta Karên Navxwe ya Sûriyê ragihand ku kontrolkirina ewlehiyê ya Balafirgeha Qamişloyê ji aliyê yekîneyên girêdayî wezaretê ve hatiye wergirtin.
RûpelNews - Di daxuyaniyekê de ku li ser hesabê xwe yê Telegramê weşand, Wezareta Karên Navxwe ya Sûriyê ragihand, wekî beşek ji cîbicîkirina berdewam a peymana ku di navbera hikûmeta Sûriyê û Hêzên Sûriyeya Demokratîk (HSD) de hatibû îmzekirin, Rêveberiya Ewlekariya Balafirgeh û Dergehên Sînorî, ya girêdayî Wezareta Karên Navxwe, kontrola ewlehiyê ya Balafirgeha Qamişloyê girtiye ser xwe.
Daxuyaniyê destnîşan kir ku veguhestin di çarçoveya peymanê de pêk hatiye, lê derbarê pêvajoyê de hûrgilî nehat dayîn.
Hat destnîşankirin ku piştî wergirtina kontrola ewlehiyê, operasyon û hemahengiya li balafirgehê dê ji aliyê yekîneyên girêdayî wezaretê ve bêne rêvebirin.
Di 29ê Çileyê de di navbera rêveberiya Sûriyê û HSDê de lihevkirineke nû hatibû kirin, ku tê de agirbest û entegrasyona gav bi gav dihatin plankirin.
Di çarçoveya vê yekê de, hêzên ewlehiya navxweyî yên girêdayî Wezareta Karên Navxwe di 2ê Sibatê de ketin parêzgeha Hesekê û di 3ê Sibatê de jî ketin navçeya Qamişlo.
