Erdogan derbarê mûşeka Îranê: Em vê yekê ji şansê re nahêlin

RûpelNews - Serokomarê Tirkiyeyê Recep Tayyip Erdogan di axaftina xwe ya di bernameyeke fitarê de, derbarê mûşeka ku îro hatî xistin de axaft.

Erdogan wiha got:

"Heger em, wek netewe, dixwazin li ser vê axê, welatê xwe yê ebedî, di nav aştî û ahengiyê de bijîn, divê em her tim hêza xwe ya astengkirinê zêde bikin. Di van demên aloz de ku herêma me tê re derbas dibe, em ewlehiya sînor û hewayiya xwe ti carî ji şansê re nahêlin. Wekî di bûyera vê sibehê de, em ji nêzîk ve bi hevpeymanên xwe yên NATOyê re bi şêwrê hemû tedbîran digirin ber û dema ku pêwîst be, em midaxaleya pêwîst dikin. Em her wiha hişyariyên xwe bi awayê herî zelal didin da ku rê li ber bûyerên bi vî rengî bên girtin."

Mûşek ji aliyê NATOyê ve hat xistin

Wezareta Parastina Tirkiyeyê ragihand ku mûşekeke balîstîk a ku ji Îranê hatibû avêtin, piştî ku ji ser Îraq û Sûriyê derbas bûbû û ber bi asîmanê Tirkiyeyê ve dihat û ji aliyê hêzên parastina hewayî yên NATOyê yên li Rojhilatê Deryaya Spî bi cihbûyî ve li hewayê hat têkbirin.

Wezaretê diyar kir ku perçeyên ku li navçeya Dortyol a Hatayê ketin, ti ziyan li pey neket û tekez kir ku dê ji bo parastina qada asmanî her gav bi biryardarî were avêtin.

Di vê navberê de, berpirsekî tirk ji AFPê re got ku armanca mûşekê ne Tirkiye bû, lê belê baregeheke li Qibrisê bû, ku mûşek ber bi wê ve diçû.

Balyozê Îranê yê li Enqere, Mihemed Hesen Hebîbulahzade, hate gazîkirin bo Wezareta Derve û derbarê helwesta Tirkiyeyê ya li hember bûyerê de hate agahdarkirin.