DYA: Pêşmerge û hêzên Iraqê dê pêşengiya şerê li dijî DAIŞê bikin
Berpirsekî amerîkî ragihand ku, piştî vekişîna leşkerên Amerîka ji Iraqê, şerê li dijî DAIŞê dê ji aliyê hêzên ewlehiyê yên Iraqê, Pêşmerge û yekîneyên din ên ewlehiyê yên li Herêma Kurdistanê ve were birêvebirin.
RûpelNews - Digel ku pêvajoya vekişîna leşkerên amerîkî ji Iraqê berdewam dike, hat ragihandin ku berpirsiyariya şerê li dijî DAIŞê dê ji hêzên Iraqê û Pêşmergeyî re were radestkirin.
Berpirsekî amerîkî di axaftina xwe ya ji bo Ajansa Associated Press (AP) re got ku, li gorî peymana ku di sala 2024an de di navbera Washington û Bexdayê de hatibû kirin, tê payîn ku leşkerên amerîkî yên li welêt heta 30ê Îlonê bi tevahî vekişin.
Berpirsê ku navê wî nehat eşkerekirin got, "DYA, Iraq û hevkarên koalîsyonê di têkbirina DAIŞê de serkeftineke mezin bi dest xistine. Hêzên ewlehiyê yên Iraqê, tevî Pêşmerge û hêzên din ên ewlehiyê yên li Herêma Kurdistanê, dê niha pêşengiya têkoşîna li dijî terorîstan li Iraqê bikin."
Berpirsî derbarê wê yekê de ti agahî neda ku çend leşkerên amerîkî li Iraqê mane an ew ê ber bi kîjan herêman ve bên veguhestin.
Vekişîn ji Hewlêrê sê hefte berê dest pê kir
Du berpirsên kurd ku ji APyê re axivîn diyar kirin ku rakirina leşkerên amerîkî û alavên leşkerî ji Hewlêrê bi qasî sê hefte berê dest pê kiriye. Navên van berpirsan nehatin eşkerekirin ji ber ku destûra wan tunebû ku daxuyaniyên giştî bidin.
Sala borî leşkerên amerîkî ji baregehên li seranserê piraniya Iraqê vekişiyan û hinek ji wan wekî beşek ji operasyonên li dijî DAIŞê li Herêma Kurdistanê man.
Serokwezîrê Iraqê Elî Zeydî jî piştî hevdîtina bi Amîral Brad Cooper, Fermandarê Fermandariya Navendî ya DYAyê re, bernameya vekişînê piştrast kir.
Zeydî diyar kir ku 30ê Îlonê "dîroka diyarkirî û dawî" ye ji bo bidawîkirina mîsyona leşkerî ya Koalîsyona Navdewletî ya li Dijî DAIŞê li Iraqê û vekişîna hêzên koalîsyonê ji welêt.
Leşkerên amerîkî di sala 2014an de vegeriyabûn Iraqê
Hejmara leşkerên amerîkî li Iraqê di sala 2007an de gihîştibû 170 hezarî. Leşkerên şer ên amerîkî di Kanûna 2011an de ji welêt vekişiyan lê li ser daxwaza hikûmeta Iraqê piştî ku DAIŞê beşên mezin ên axê li Iraq û Sûriyê dagir kir, di sala 2014an de vegeriyan.
Piştî windakirina herêmên di bin kontrola DAIŞê de, mîsyona şer a koalîsyonê li Iraqê di sala 2021an de bi dawî bû. Piştre DYAyê domand ku li welêt hêzeke bi qasî 2 hezar û 500 leşkeran biparêze ji bo perwerdekirina hêzên Iraqê û pêkanîna operasyonên hevpar ên li dijî DAIŞê.
Li gorî peymaneke ku di sala 2024an de di navbera Washington û Bexdayê de hat îmzekirin, hat biryardan ku mîsyona leşkerî ya koalîsyona bi pêşengiya DYAyê li Iraqê bi awayekî qonax bi qonax were bidawîkirin.
