Di xwepêşandanên Îranê de 6842 kes hatine kuştin

RûpelNews- Ajansa Nûçeyan a Çalakvanên Mafên Mirovan li Îranê (HRANA) rapora xwe ya herî dawî ya li ser qurbaniyên xwepêşandanan weşand. Li gorî raporê, heta niha mirina 6 hezar û 842 kesan hatiye piştrastkirin, ku 146 ji wan zarok in; 214 ji miriyan herwiha endamên hêzên ewlehiyê ne.

HRANA di rapora xwe de diyar kir ku ji bilî hejmarên piştrastkirî, ew niha li ser mirina 17 hezar û 91 kesên din lêkolînê dike, ji bo ku hêj delîlên wan ên temam nehatine komkirin.

Derbarê birîndar û girtîyan de, ajansê diyar kir: "Hinek ji wan bi giranî, 11 hezar û 21 kes birîndar bûn, wekî din, 49 hezar û 60 xwepêşander li bajarên cuda yên li seranserê Îran û Rojhilatê Kurdistanê hatine girtin."

Ev hejmarên ji rêxistinên mafên mirovan bi awayekî berbiçav ji amarên fermî yên hikûmeta Îranê cuda ne. Di 21ê Çileyê de Encûmena Ewlekariyê ya Îranê ragihand ku hejmara giştî ya qurbaniyan 3 hezar û 117 bû, ku li gorî îdiayên wan, "2 hezar û 427 ji wan sivîlên bêguneh û hêzên ewlehiyê bûn."

Roja Çarşema borî, Ofîsa Serokatiya Komara Îslamî ya Îranê ragihand ku li ser fermana Serokomar Mesûd Pezeshkian, nasnameyên xwepêşanderên ku hatine kuştin dê bên eşkerekirin. Paşê, ajansa nûçeyan a fermî IRNA navên 2 hezar û 986 xwepêşanderan belav kir û diyar kir ku navên 131 kesên mirî nehatine eşkerekirin ji ber ku nasnameyên wan nehatibûn diyarkirin.

Xwepêşandan di 28-12-2025an de li Tehranê ji aliyê esnafan ve li dijî buhayê jiyanê yê bilind û kêmbûna nirxê tumenê dest pê kirin û paşê belav bûn û tundûtûjî peyda bû.

Li gorî amarên Komîteya Ewlekariya Neteweyî ya Meclîsa Îranê, xwepêşandanan de zerar gihişt 250 dibistan, 300 mizgeft, 90 medrese û 2 hezar û 221 otomobîlên hêzên ewlehiyê.