Bexda | Hêzên Dije-Terora Iraqê li Devera Kesk hatin belavkirin

PeyamaKurd – Ji bo rêlibergirtina her cûre êrîşên milîsan li dijî Balyozxaneya Amerîkayê, hêzên Dije-Terora Iraqê li Devera Kesk a Bexdayê hatin belavkirin.

Bi nêzîkbûna salvegera kuştina Fermandarê berê yê Feyleqa Qudsê Qasim Suleymanî û Cîgirê Serokê Desteya Heşda Şeibî Ebû Mehdî Muhendis, endamên Hîzbullaha Iraqê wê li Bexdayê xwepêşandanên serbazî bikin.

Li gor çavkaniyên ewlehiyê yên Iraqê dane zanîn, karwaneke Hîzbullah û Nuceba ber bi Bexdayê ve hatine, da ku beşdarî xwepêşandana serbazî bibin.

Rêberê Hêzên Esayîb Qeys Xez'elî di derbarê vê de destnîşan kiriye; tu planek wan ji bo êrîşkirina ser Balyozxaneya Amerîkayê ya li Bexdayê tune ye.

Qeys Xez'elî diyar kiriye: “Êrîşkirina ser balyozxaneyê, ji sûdê zêdetir zirar dide.”

Li ser neyartiya kabîneya Mistefa Kazimî jî, Qeys Xez'elî eşkere kiriye: “Em li dijî wê yekê ne ku Kazimî bibe Serokwezîr, ji ber ku nasnameyên wî yên du welatan heye.”

Herwiha di derbarê tolhildanê de jî Xez'elî daye zanîn: “Ez poşmanbûnekê hîs dikim, ji ber ku me dereng bersiva terorkirina serkirdeyên xwe da. Divê bersiva Iraqê ji bo terora wan serkirdeyan, ji bersiva Îranê bihêztir bûye.”